ROBAN, 28 Sept: Opis Industri Pemakai, Komoditi enggau Pemansang Wilayah Sarawak (M-FICORD) benung berundingka chara engkeman dikena ngangkatka agi rega produk betanam betupi di Betong.
Menteri M-FICORD Dato Sri Dr Stephen Rundi Utom madah, tu beduduk ari pemisi Padang Bilun Menasan Pandak (STOLPort) enggau Palan Nginjin, Ngumpul Sereta Mungkus Produk Asil Betanam Betupi (CPPC) di Bebuling, Spaoh ke benung dikemansangka perintah.
“Kebendar lebuh aku bejalai ngagai STOLPort ngagai CPPC Bebuling iya nya endur ke dianggap kitai ngembuan ‘Fit Stok’.
“Nya alai, kitai enda tau enda nguna kereban teknologi ke tinggi dikena mantu ngangkatka agi rega produk nitih peneka kitai ngambi senutuk enggau pemisi padang bilun tu (dudi hari),” ku iya.
Rundi mansutka pekara nya maya Program Jangkauan Luar MLNG Bestari ba Sekula Primari (SK) Ulu Roban, empai lama.
Nangkan ke nya, Ku Rundi M-FICORD deka terus chakah berundingka chara dikena mantu peranak rumah panjai ari perengkaguna ke dikemisi.
“Ungkup timpuh ke panjai padang bilun tu enda beguna nyadi aku mega bisi bejalai ngagai ‘GWG Green World Genetic’ sebengkah palan ngasilka benih utai tanam ke ngembuan rega tinggi manggai bejuta-juta dianjung nguna bilun ngagai menua bukai.
“Nyadi, aku ngarapka udah tu perintah nengah M-FICORD betuai ke aku empu mujur ngiga chara engkeman dikena kitai ngangkatka pekara tu nguna perengka guna ke dikemisi,” ku terang iya.
Sama bisi datai Tuai Pegawai Ekskutif Gerup Serikat MLNG Mohamed Syazwan, Tuai Pegawai Opis Pelajar Pelilih (PPD) Saratok Anis Madeli enggau ke bukai.-TVS
