BETONG, 26 Sept: Kaban Kunsil Nengeri (ADUN) Saribas ngelalu Opis Residen Bagi Menua Betong ngaduka baru bidang kuasa ke ngaul Tuai Raban Bansa (KMKK) ba pelilih nya.
Ku iya, tu berindik ari bidang kuasa KMKK baka Penghulu diperati agi nitihka bidang kuasa ke lama.
“Ba aum tu tadi, kitai bisi berandau ke pekara bekaul enggau status pengawa nyiri KMKK.
“Pia mega, aku bisi merambu ngagai Opis Residen enti ulih ngaduka baru bidang kuasa raban Penghulu dikemaruka laban naka diatu agi nitihka bidang kuasa ke lama,” ku iya.
Razi ke mega Sapit Menteri Pengelantang Indu, Nembiak Mit enggau Pengelantang Komuniti (KPWKK) Sarawak madah munyi nya pengudah ngulu Aum Komiti Panel milih Tuai Raban Bansa (KMKK) ba Bilik Aum Kenyalang, Opis Residen ditu, kemari.
Nangkan ke nya ku Razi, pemesai kandang endur ke dipegai siku-siku KMKK diatu majak mit tang penyampau rayat ke dijaga majak nambah.
“Diatu bungkur kandang menua ke dijaga (Penghulu) majak mit tang bungkur genturung pendiau ke dijaga majak mayuh.
“Nya alai, aku minta ngagai Opis Residen Betong patut ngaduka baru bidang kuasa genturung pendiau ke dipegai siku-siku penghulu ke baru dipadu nyengkaum nambahka Penghulu ba sitak aku (DUN Saribas),” ku iya.-TVS
