BETONG, 26 Sept: Konvensyen Khas Parti Pesaka Bumiputera Bersatu (PBB) Ungkup Zon Betong deka diatur dalam bulan Oktober tu.
Beduduk ari nya, Chairman Parti Pesaka Bumiputera Bersatu (PBB) Pampang Saribas Mohd Razi Sitam madah siti ari isu ke chukup ‘angat’ diatu iya nya isu menara telekomunikasyen nyadi nya antara mosyen ti deka dibantaika maya konvensyen khas nya ila.
“Ngelansa pasal mosyen ke deka dibantai maya Konvensyen KHas PBB bisi udah dikerandau sebedau tu.
“Pekara tu ila deka dibantai Sapit Chairman Komiti Konvensyen Khas PBB Zon Betong Datuk Julaihi Narawi.
“Antara mosyen tu ila ngaul isu karan, ai beresi sereta isu ke benung angat diatu iya nya menara telekonunikasyen ke apin beoperasyen,” ku iya.
Razi ke mega Kaban Kunsil Nengeri (ADUN) Saribas madah munyi nya pengudah ngulu Aum Komiti Panel milih Tuai Raban Bansa (KMKK) ba Bilik Aum Kenyalang, Opis Residen ditu, kemari.
Lebuh nerang silik, Razi madahka pemutus pasal mosyen nya deka dikerandau bala ketuai PBB baru ba timpuh ke semak.
“Kitai apin bisi pemutus, pekara tu agi dikerandauka baru tang sebedau 8 Oktober tu ila baru kitai nentu sekeda mosyen ti deka dibai maya Konvensyen.
“Iya ke disebut aku nya semina ‘ulu lunga’ aja tang nya mih poin besai ti deka dibantai maya konvensyen…asai aku agi mayuh,” ku iya.-TVS
