KUCHING, 24 Sept: Pemisi mengeri gauk ungkup anak mit deka ditegapka nengah penumbuh Kaunsil Pengari Anak Mit Sarawak ti deka dipadah udah tu ila.
Menteri Pemansang Indu, Anak Mit enggau Pengelantang Komuniti Sarawak, Dato Sri Fatimah Abdullah madah, penumbuh kaunsil nya deka nyadi pelasar dikena mendingka penemu enggau hak anak mit sereta nempa komuniti ke inklusif.
“Kami kemari bisi berandauka pekara tu ba renggat opis menteri dulu.
“Baka ni kitai ulih mantu lima iti kaunsil tu ngulihka baka matak ari sukut nembiak nengah penumbuh Kaunsil Pengari Anak Mit Satawak nitih kaunsil.
“Nitih bidang sitak kaunsil. DBKU siti, MBKS siti, Sibu, Padawan, Miri.
“Kitai deka bekerejasama enggau Opis Pelajar ke bisi penau diasai bisi penau enggau ulih dipadu kitai dalam Kaunsil Pengari Anak Mit Sarawak lalu sida ulih nyadi sebagi ari komiti ke ulih bekerejasama tauka sida ulih dikaul nengah kaunsil ungkup aktiviti sida.
“Pia mega mendingka penemu sida laban nya deka ngarika penemu sida anak mit enggau udah nya polisi program enggau aktiviti ulih dipejalaika diatur belanja enggau betul,” ku iya.
Fatimah mansutka jaku nya maya pengawa bejadika The Salvation Army Kuching Children’s Home di Muara Tuang, Kota Samarahan, kemari.
Lebuh nerang silik, Fatimah madah dikena nentuka sarawak diaku nyadi mengeri gauk ungkup anak mit ari UNICEF.
Pemisi raban anak mit dalam bejalaika polisi dikena nempa mengeri guak ungkup anak mit patut diperunding.
“Siti ari pekara ti kitai deka kemeratka iya nya pemisi raban sida ke biak iya nya mai sida ke nembiak tu ke diperetika nyadi orang umur baruh 18 taun dalam polisi dalam bajet ba program enggau aktiviti ke dipejalaika sekalika nya nengah perintah tauka iya ke pemadu beguna nengah kaunsil.
“Kaunsil tu mih ti pekara keterubah diperunding baka ni deka ngaul sida ke biak. Baka ni kitai ulih ngemasukka bala anak mit tu dalam langgur kitai ba renggat kaunsil ambika banding ba tuju bajet,” ku iya.-TVS
