SPAOH, 24 Sept: Sapit Presiden Parti Pesaka Bumiputera Bersatu (PBB) Datuk Amar Douglas Uggah Embas madah bisi dua pekara besai deka dibantai maya Konvensyen Khas Parti PBB di Betong kena bulan Oktober tu.
Ku iya, siti ari nya bekaul enggau Strategi Pemansang Pasca Covid-19 (PCDS 2030) ke mai tuju ngambika bala kaban PBB lebih mereti senentang program-program pemansang ke deka dipejalaika perintah nengeri.
Kelimpah ari nya, ku Uggah pekara kedua deka dibantai maya konvensyen nya ila iya nya mantaika sekeda mosyen meri sukung penuh ngagai Presiden PBB, Datuk Patinggi Tan Sri Abang Johari Tun Openg.
“Kitai bisi dua bengkah pekara deka dikerandau maya konvensyen iya nya siti bekaul enggau perambu sereta program-program baruh Pelin Pemansang Post Covid – 19 (PCDS 2030).
“Nerangka nama program ti deka dipejalaika perintah dikena ngemansangka nengeri Sarawak nyengkaum di Betong.
“Udah nya, lumur dua kitai mega deka mantai mosyen tang penyampau apin temu…deka nentuka rayat tauka kaban PBB terus meri sukung penuh ngagai tuai parti PBB,” ku iya.
Uggah ke mega Sapit Premier Sarawak madah munyi nya pengudah tembu program Tuai Begulai Enggau Rayat ba Rumah Mendit Unsu di Penom, Ulu Paku Spaoh pagi tadi.
Lebuh nerang bekaul enggau penyikap komiti pengatur Konvensyen PBB Zon Betong, dia Uggah madah naka tu semua pengawa bejalai enggau lanchar.
“Ungkup konvensyen ba Betong nya ila gaya dipeda aku bejalai enggau lanchar lalu 26 September tu kami deka baum baru enggau bala pegawai ba Bagi Betong dikena ngenukuka bagi program ti deka diatur maya nya ila,” ku iya.
Konvensyen Khas PBB taun tu diatur ba empat bengkah zon di serata Sarawak nyengkaum Kuching, Betong, Sibu enggau Miri beserimbai enggau 60 taun Sarawak Merdeka.
Di Betong Konvensyen Khas PBB disadang deka dipenyadika Premier Sarawak ke mega Presiden PBB, Datuk Patinggi Tan Sri Abang Zohari Tun Openg.
Dulu agi ari nya, Uggah ke mega Kaban Kunsil Nengeri (ADUN) Bukit Saban bisi ngatur randau begulai enggau pengempu ‘Jubilee Occupation Tickets’ (JOT) ari sekeda rumah panjai di Ulu Paku enggau Lempaong Anyut ditu.
JOT dikeluarka Perintah Koloni British maya taun 1953 ngagai pekebun getah ba genap bagi menua ngambika sida ulih nanam enggau nyual getah.
Sama bisi datai Kaban Parlimen Betong Dr Richard Rapu, Sekretari Politik ba Opis Premier Sarawak Roselind Mapong Sabai, Pegawai Pelilih Betong Alferd Geling Ason, Penguasa Tanah enggau Survei Betong Morris Nayup enggau ke bukai.-TVS
