PUSA, 23 Sept: Regata Tandang Sari (RTS) 2023 nyadi sebengkah pelantar ke chukup besai dikena nyungkak sosio ekonomi rayat di pelilih Pusa.
Kaban Kunsil Nengeri (ADUN) Beting Maro, Razaili Gapor madah, iya andal pengerami nya ulih mantu nyungkak penatai pemisi rayat di menua nya.
“Kebendar tu endang siti program ti deka diangkatka kitai nyadi siti ari dua pugu besai pemansang ekonomi ba sitak Pusa.
“Regata siti ari program ke ulih ngangkat ekonomi kitai ditu nengah aktiviti ke bekaul dagang temuai sereta bekaul enggau aktiviti ngelaku ke produk dikemisi kitai ditu (Pusa),” ku iya.
Razaili mansutka jaku nya lebuh bejadika Regata Tandang Sari (RTS) 2023 ba Pangau Besai Regata Tandang Sari, kemari.
Nangkan ke nya, ku Razaili tu chukup senutuk enggau tuju deka ngangkat pelilih Pusa nyadi palan pematak temuai.
“Tambah mega kita deka meda pelilih Pusa enggau sitak kunsil nengeri (DUN) Beting Maro nyadi siti palan pematak temuai.
“Nya kebuah, pengerami tu dikearap ulih ngangkat ke penatai pemisi mensia mayuh ditu laban kitai nemu di Pusa tu mayuh produk ke ulih dikemansangka ke udah dikelala nama baka gula apong, bemacham kuie enggau ke bukai,” ku terang iya.
Ungkup penemu, Regata Tandang Sari diatur tiga hari berunggu bepun 22 nyentuk 24 September tu.
Regata Tandang Sari 2023 mega bisi dipasuk tiga belas tim lokal iya nya Sri Berjaya Sayang Saribas, Komeng Saribas, Bujang Vaie, Burung Garuda, Cahya Pusa, Wali Putih, Jang Saribas, Nelayan Rempit, Darrah Muda, Gp Binladen, Pantai Damai, Panchar Buraq Sakti, Kijang Perkasa, Cahaya Naga Sakti enggau Raja Sungai Regata Pusa 2019 tim Barracuda.
Sama bisi datai Kaban Parlimen Batang Lupar, Mohamad Shafizan Kepli, pemangku Pegawai Pelilih Pusa Bujang Ladi, bala tuai opis perintah, tuai raban bansa enggau ke bukai.-TVS
