DEBAK, 23 Sept: Kerejasama rat mensia mayuh enggau raban ejensi perintah ke bekaul chukup beguna dikena munaska penyakit denggi.
Sapit Menteri Pengelantang Indu, Nembiak Mit enggau Pengelantang Komuniti (KPWKK) Sarawak Mohd Razi Sitam madah, kerejasama rat ari semua piak patut dikempitka agi ngambi ke semua program ke diatur perintah dikena munas ke penyakit nya ulih dikemujur.
“Pemar besai lebuh kitai bejalai ke pengawa nagang pengerekai penyakit denggi iya nya ari ulah komuniti kitai empu ti kurang nyaga pemeresi rampa menua ti bibas ari nyamuk Aedes.
“Nya alai, aku nesau semua ejensi perintah baka Kaunsil Pelilih enggau mensia mayuh ulih sama-sama ngambi singkang proaktif nagang pengerekai enggau nyaga pemeresi kandang endur ke ngelinggi,” ku iya.
Razi ke mega Kaban Kunsil Nengeri (ADUN) Saribas mansutka jaku nya maya bejadika Pengawa Ngintu Bulan Malaysia Gerai Lantang (Wellness Month) enggau Sejam Malaysia Beresi Renggat Bagi Menua Betong 2023 ba Diwan Millenea Debak pagi tadi.
Nangkan ke nya, ku Razi kelimpah ari nya kimpin ngemunas penyakit denggi baruh Komiti Pengereja Pengawa Pelilih (JTD) mega patut chakah agi gawa udah tu.
“Aku andal lalu pechaya ke perayat di Betong ditu ulih meri komitmen tinggi ngagai pengawa ngemunaska penyakit denggi tu bechuanka peneleba maya napi Covid-19 sebedau tu.
“Kimpin ngemunaska denggi tu mega patut diatur suah agi baruh Komiti Pengereja Pengawa Pelilih (JTD) ngaul ejensi pelilih sereta tuai raban bansa.
“Genap bengkah genturung pendiau enggau Kawasan Rukun Tetangga (KRT) mega patut sama bejalai ke pengawa kimpin rumah beresi nadai Aedes ba kandang endur sida,” ku iya.
Sama bisi datai Pegawai Pengerai Bagi Betong Dr Mohammad Norhaizam Ahmad, Sapit Pegawai Pelilih Betong Jamain Wahab, Penulung Pegawai Admin Opis Pelilih Mit Debak Mohammad Hafiz Kepli enggau ke bukai.-TVS
