KUCHING, 23 Sept: Parti Pesaka Bumiputera Bersatu (PBB) ke nyadi tulang belakang Gabungan Parti Sarawak (GPS) seruran bejalaika tanggungpengawa berat dalam nentuka penyerakup enggau pengering gempung nya.
Mandal Kanan PBB, Datuk Seri Fadillah Yusof madah, ba Konvensyen Khas sehari tu bisi lapan mosyen disetuju semua kaban PBB sereta udah disua ngagai Presiden PBB, Datuk Patinggi Tan Sri Abang Johari Tun Openg.
“Kami bala kaban Parti Pesaka Bumiputera Bersatu (PBB) meri sukung ke nadai bebagi ngagai Tuai PBB ke mega Premier, YAB Datuk Patinggi Tan Sri Abang Johari Tun Openg ngambika terus ngiring PBB enggau GPS sereta nentuka penegap politik Sarawak enggau menua Malaysia.
“Kami bala kaban PBB mega meri pengarap enggau pengandal penuh ngagai iring PBB enggau GPS dalam ngiring Sarawak enggau nentuka hak-hak baka ke udah dipekat dalam Sempekat Malaysia 1963 (MA63), Ripot Inter-Government Committee (IGC) 1962 enggau Kunstitusyen Perintah Besai dipulaika Perintah Besai ba renggat Perintah Besai baka ke udah disemaya,” ku iya.
Iya mansutka jaku nya maya Konvensyen Khas PBB Sarawak 2023 Zon Kuching, di Hikmah Exchange, ditu sehari tu tadi.
Iya mega ke Sapit Menteri Besai madah, semua kaban PBB besemaya deka nentuka status enggau tanggungpengawa PBB mengkang tegap nyadi parti tulang belakang ngagai iring GPS enggau Perintah Sarawak.
“Kami bala kaban PBB meri sukung penuh ngagai Polisi Ekonomi Baru ke bepelasar ngagai Ekonomi Gadung enggau Ekonomi Hidrogen sereta inisiatif dipejalaika YAB Premier dalam ngangkatka ekonomi Sarawak bepelasar ngagai atur ke udah dipekat enggau pekara-pekara ke udah ditanggam dalam dalam MA63, Ripot IGC enggau Kunstitusyen Nengeri Sarawak seriris enggau Sempekat Pemereti Ati Perintah Penyerakup ke udah ditanggam kena 16 Disember 2022.
“Kami bala kaban PBB besemaya deka nentuka penyerakup rayat pupu bansa, pengarap enggau budaya di Sarawak terus dijaga enggau ditegap awakka rayat ulih idup lantang senang,” ku iya.-TVS
