DEBAK, 23 Sept: Sapit Menteri Pengelantang Indu, Nembiak Mit enggau Pengelantang Komuniti (KPWKK) Sarawak, Mohd Razi Sitam madah Opis Pelajar Malaysia (KPM) patut terit agi bejalai ke atur dikena mutar kes beduan enggau keruga seksual ba sekula.
Ku iya, tu beguna bendar dikena nagang penanggul nya ari majak nyadi ba jam diatu.
“Aku nyaran KPM patut bejalai ke atur ti terit agi ngagai nembiak ti rindu ngereja pengawa beduan tu.
”Pengawa tu enda tentu manah ngagai pengasai ati apai indai nembiak ti dikeduan, laban ulih nerenak ati dendam enggau pangan diri lebih agi enti bekaul enggau isu rasis.
“Beduduk ari nya, perintah nengah KPM patut terit ngambi ulih nagang ulah ke enda menuku,” ku iya.
Razi ke mega Kaban Kunsil Nengeri (ADUN) Saribas mansutka pekara nya lebuh meri timbal bekaul enggau garis lalau mutar isu beduan enggau keruga seksual ti dilancharka Menteri Pelajar Fadhlina Sidek empai lama.
Udah nya, ku Razi, pengawa KPM ngelancharka garis lalau mutar isu beduan enggau keruga seksual endang engkeman lalu enda nulak nyema bisi ngatur sebarang kerejasama enggau opis nya dudi hari.
“Nya sigi pengawa ke manah laban jam diatu mayuh kes beduan diripotka tauka dikerembai sebelah sosial rama.
“Ari pemisi garis lalau tu iya ulih nyadika malin ngagai raban bekaul sekali nya ba sekula, universiti enggau palan ngibun anak mit enggau ke bukai.
“Kitai endang sedia deka bekerejasama enggau opis tu ba perintah besai ngambi ulih besaup meri penyedar ngagai mensia mayuh ukai semina ngagai nembiak sekula tang bala apai indai enggau ke bukai ngambi ulih bekerejasama ngemujurka polisi perintah senentang pekara tu.-TVS
