PUSA, 23 Sept: Tim lumba perau ari Kalok Pusa iya nya Barracuda deka bebendar ngetan gelar ‘Raja Sungai’ Regata Tandang Sari (RTS) 2023.
Menijar tim Barracuda Mohidin Bolhassan madah, iya andal tim sida agi ulih ngetanka gelar champion nengah pengeransing sereta semangat ke dipandangka raban tim nya sekumbang belatih pengelama dua bulan ke udah.
“Kami chukup andal ulih ngempu gelar champion penuh taun tu.
“Kitai meda tadi (lemai kemari) ba pekit lumba sakai 30 enggau 25 dia tim kami mujur menang.
“Nya alai chukup andal mih tambah mega udah meda pengulih sida pengudah belatih sepengelama dua bulan tu,” ku iya.
Mohidin madah munyi nya pengudah ngemata ke Regata Tandang Sari diatur ditu ba hari keterubah kemari.
Taja pia ku iya, sida tetap ngadang pengering tim bukai ke sama ngambi bagi ba lumba serak tu.
“Enti kitai meda ba taun 2019 pengulih tim bukai bisi nambah mimit, tambah mega kitai nemu kitai deka dilaban tim bukai ke sama bisi pengering sereta bepenau begelar champion,” ku iya.
Ungkup penemu, pemenggi gelar Raja Sungai Regata Tandang Sari 2023 deka mai pulai perais mata duit sepenyampau RM15, 000 disempulang tropi enggau midul.-TVS
