SARIKEI, 22 Sept: Perintah Sarawak meri belanja sepenyampau RM2.1 juta dikena ngemujurka 18 projek ngupas sungai enggau parit di Meradong.
Kaban Parlimen Sarikei, Dato Sri Huang Tiong Sii madah, agih belanja nya deka mantu mutarka penusah bah ke suah ditapi raban orang bumai di Meradong.
Kenu ku iya, belanja nya dikemendar nengah Opis Parit enggau Entali Ai bagi menua Sarikei (DID) ungkup pengawa ngupas sungai enggau parit sepanjai 90.71 kilometer.
Kelimpah dikena nangkir parit agih belanja nya mega deka dikena ngemujurka projek bekaul enggau entali ai sereta mutarka penanggul bah ke suah ngampuhka kebun nyentuk ngeruga utai tanam sida.
Berebak enggau nya, Tiong Sii ke mega Sapit Menteri Pengeraja Asal, Rampa Menua Enggau Ubah Klimet nyemetak madahka, perintah deka terus negapka sektor betanam betupi laban nemu penau besai bidang nya dalam mantu pemansang sosioekonomi rayat.
Udah nya, palan strategik Meradong ke ngembuan rentayan besai logistik baka jalai raya ulih ngemuntangka perayat ba menua nya ngelakuka produk betanam betupi.-TVS
