KUALA LUMPUR, 22 Sept: Anak-anak Sarawak ke dianjung ke Semenanjung Malaysia ungkup nampung pelajar ulih nyadi teladan dalam nyaga pengelantang menua.
Sapit Menteri Besai (TPM), Datuk Seri Fadillah Yusof madah, pemereti ati enggau penyerakup bansa ba nengeri Tanah Kenyalang nya, ulih nyadi teladan pengidup nerenak semangat baka diri sebilik dalam sebuah komuniti.
“Bala anak Sarawak ke dianjung ke Semenanjung tu, kita kebendar duta ke mai sada Sarawak enggau deka mantai baka ni pengidup rayat Sarawak ke penuh enggau pengelantang.
“Pandangka kitai ngagai Semenanjung tu, nyadi ngarapka ba Semenanjung, deka bisi idup ke penuh pengelantang sereta nengah chara tu kitai deka ngurangka laya nyadi ba Semenanjung baka diatu,”ku iya.
Fadillah mansutka jaku nya maya Pengawa Betukar Sempekat Pemereti Ati (MoU) antara Petronas enggau Yayasan Sarawak, ditu kemari.
Sama bisi datai Direktor Yayasan Sarawak, Mersal Abang Rosli seerta Direktor Pengatur Pengawa ke mega Tuai Pegawai Eksekutif Gerup Serikat Malaysia LNG, Mohamed Syazwan Abdullah@Laga Jenggi.
Nengah Yayasan Sarawak enggau anak serikat Petronas iya nya Malaysia LNG Sendirian Berhad, sekularship Program Borneo Bestari dibantai dikena melanja nembiak sekula sekondari nampung pelajar ba Sekula Bemalam Penuh, Semenanjung Malaysia.
Ninting taun, Yayasan Sarawak diberi kuota nganjung 64 iku nembiak Sarawak ngagai 18 sekula ba baruh Opis Menteri Pelajar Malaysia.
Nengah komitmen Petronas serak tu, lebih 30 nembiak deka dipelanja penuh ninting taun, mungkur kus sekula, yuran, uniform sekula enggau bantu belanja ninting bulan.-TVS
