SARATOK,21 Sept: Serakup Pengajar Sarawak (STU) meri sukung ngagai peminta Kongres Serakup Orang Gawa Perintah (Cuepacs) ti ngansak perintah besai nikika gaji orang gawa perintah sepenyampau rm300 enggau bonus sebulan setengah gaji.
Presiden STU Kullin Djayang madah, tu perambu ke chukup manah berindik ari ungkus pengidup enggau rega barang guna ninting hari jam ke diatu ke majak niki.
“Bekaul enggau peminta niki gaji tauka upah pengereja pengawa perintah nya endang siti utai ke patut.
“Tu jam diatu berindik ari rega barang ke majak niki lalu pia mega dikena nganti penyebela gaji orang gawa perintah ke agi lama iya nya ba taun 2025.
“Ari pengawa ngatur baru gaji sida ditambah, nya dikearap meri pengelantang lebih agi ngagai sida (ruang bilik) ti mayuh tubuh sereta benung melanja bala anak nampung belajar ba IPT (Palan Pelajar Tinggi),” ku iya.
Kullin madah munyi nya lebuh dipinta meri timbal bekaul enggau peminta Cuepacs ti ngasuh perintah nikika gaji pengereja pengawa perintah RM300 enggau meri bonus sebulan setengah gaji nengah Presiden Cuepacs, Datuk Adnan Mat, kemari.
Pia mega ku Kullin, STU endang nyukung penuh peminta dikenataika Cuepacs nya laban pengereja pengawa perintah di menua lalu apin nerima bonus kenyau 10 taun ke udah.
“Kitai endang nyukung penuh lalu peminta ari Cuepacs nya siti perambu ti manah.
“Kurang lebih 10 taun orang gawa perintah lalu nadai nerima bonus ari perintah nyangka enda ulih dibayar sekali laban ungkus nya nyangka besai ba perintah.
“Nyadi arapka atur nya ulih dibayar pupuk nitih ke timpuh ke patut tauka berenggat nitih ke pemisi perintah diatu,” ku iya.
Ungkup penemu, sebedau tu orang gawa perintah semina nerima bantu khas ari perintah lalu kepenudi sida nerima bonus sebulan setengah gaji iya nya taun 2012.-TVS
