BINTULU, 21 Sept: Gabungan Parti Sarawak (GPS) deka nganjung chalun ari Parti Pesaka Bumiputera Bersatu (PBB) ba Pengawa Bepilih Mit (PRK) Kunsil Nengeri (DUN) Jepak.
Pekara nya dipansutka Premier Sarawak Datuk Patinggi Tan Sri Abang Johari Tun Openg.
“Endang, kitai deka nganjung (chalun). GPS deka nganjung chalun PBB,” ku iya maya Pengawa Nasih Tanah Rosmari-Marjoram Onshore Gas Plant, ditu, tadi.
Komiti Pengawa Bepilih Besai (SPR) udah dipadah nengah Speaker DUN Sarawak Tan Sri Datuk Amar Mohamad Asfia Awang Nasar bekaul enggau pemuang penuduk Jepak bekau ari pemidang penyandang iya, Datuk Talib Zulpilip kena 15 September tu tadi.
SPR deka baum kena 25 September tu endur netapka haribulan bekaul enggau pengawa bepilih mit nya.
Niang Talib ari PBB, nyadi ADUN Jepak pengelama enam penggal nyentuk Pengawa Bepilih Besai Negeri 2021. Iya menang bediri ba DUN Jepak nengah majoriti undi 4,243.
Talib mega kala dipadu nyadi Menteri ba Opis Kepala Menteri Sarawak (Integriti enggau Ombudsman) Sarawak sebedauh Pengawa Bepilih Besai Nengeri ke-12 taun 2021. – TVS
