SARATOK, 19 Sept: Opis Bekal Ai Beresi Menua Pesisir (JBALB) BETONG diansak lengkas agi bejalaika Projek Nyambung Paip Ai Graviti nuju Rumah Mang, Sungai Wong Brayang ke diuan 29 pintu ruang bilik.
Kaban Kunsil Nengeri (ADUN) Krian Friday Belik madah, projek nya diberi iya baruh Projek Transformasyen Menua Pesisir (RTP) taun 2022 nengah agih sepenyampau RM100,000.
“Aku bisi ngungkupka belanja ari RTP aku taun 2022 iya nya sepenyampau RM100,000 ngagai Rumah Mang Sungai Wong Brayang kena sida iya ngadu paip ngena graviti sechara beripai.
“Tang aku baru dipadahka sida Opis Bekal Ai Menua Pesisir (JBALB) Betong madah projek tu lalu bedau ulih dikereja,” ku iya.
Friday mansutka pekara nya sepengudah tembu pengawa nutup Program Literasi Dan Fungsian (PLF) diatur Opis Pemansang Raban Bansa (KEMAS) Pampang Saratok ba Rumah Mang Inggol Sungai Wong Brayang, kemari.
Nangkan ke nya, Friday madah diri andal JBALB Betong ulih bejalaika pengawa nya dikena mantu mutarka penanggul suntul bekal ai ba Rumah Mang.
“Nya alai aku udah madah ngagai JBALB awak ke sida berunding enggau orang ngempu rumah lebih agi tuai rumah enggau sida serumah di Sungai Wong ditu.
“Pelaba aku, nadai penanggul laban orang rumah panjai udah setuju deka ngaga ngena chara beripai lalu diatu semina bepanggai ngagai JBALB,” ku iya.
Beduduk ari nya, Friday ngarapka penanggul nya ulih teputar enggau lengkas ke pemaik peranak rumah panjai.
Ngelansa pekara bekaul, ku Friday projek ke sebaka udah kala dipejalaika ba Rumah Chenggi Brayang Ulu enggau Rumah Nyair Mah ba Brayang Baru Seblak ulih ditembu dalam timpuh urung dua minggu aja.
Sama bisi datai Pegawai Unit Pemansang Komuniti KEMAS Sarawak Wito Daneu, Pegawai KEMAS Pelilih Saratok Latif Amat enggau ke bukai.-TVS
