DEBAK, 18 Sept: Kaban Parlimen Betong Dr Richard Rapu meransang rebak baru ke bisi minat dalam bidang teknikal anang ngelepaska peluang belajar ba endur bisi disediaka perintah baka Palan Penyulut Teknikal Sarawak (CENTEXS).
Ku iya, pengelandik ba Bidang Teknikal enggau Vokasional (TVET) chukup beguna dikena nentuka pengidup ke lebih menyana dudi hari.
“Nya alai enggau peluang ke bisi disediaka perintah menua Sarawak nengah Centexs ditambah bisi bantu agih belanja ari Perintah Besai aku meransang bala nembiak ke bisi minat dalam bidang teknikal ambi mih peluang nya nambah ke pengelandik diri.
“Kebuah pia laban pengelandik teknikal enggau vokasional tu chukup beguna dikena ngidupka diri dudi hari,” ku iya.
Iya madah munyi nya ngagai raban media pengudah ngemataka Konsert Cinta Merdeka diatur nyerumba Pesta Debak 2023 enggau ngintu pengerami Hari Malaysia bepalan ba Riveria Sport Centre ditu kena Hari Enam tu tadi.
Dulu agi ari nya, Dr Richard nyambut manah senentang agih belanja sepenyampau RM30 juta ti dikemendar perintah besai dikena ngemansang ke pelajar TVET di Sarawak.
“Terima kasih ngagai Sapit Menteri Besai laban udah ngemendarka agih belanja nya ti chukup seriris enggau inisiatif program pemansang ba menua Sarawak.
“Kitai sama nemu, ditu YAB Premier Sarawak deka ngemansangka ekonomi baru bepelasarka kuasa hidrogen enggau solar.
“Nya alai, semua tu chukup begunaka raban bepengelandik dalam bidang teknikal, vokasional, enggau injiniring,” ku iya.
Ungkup penemu, sebedau tu Sapit Menteri Besai Ke Mega Menteri Pemansang Genturung Pendiau Wilayah (KKDW) Datuk Seri Dr Ahmad Zahid Hamidi maya ngulu sebengkah program di Santubong bisi madahka Perintah Besai udah ngemendar ke agih belanja sepenyampau RM30 juta ungkup CENTEXS kelai nyukung program pemansang pelajar TVET di Sarawak. -TVS
