ROBAN, 18 Sept: Komitmen Opis Telekomunikasyen enggau Digital (KKD) ti deka mutar ke isu menara telekomunikasyen ti apin disikap enggau pemanchar di nengeri tu dipuji.
Kaban Kunsil Nengeri (ADUN) Krian Friday Belik madah, iya arapka pekara ulih teputar ngambika rayat di menua nadai agi sebana pasal penanggul arus internet baka ke udah.
“Kitai endang ngarapka asil ti positif ari aum nya lalu arapka semua menara ke apin beoperasyen nyentuk diatu ulih diputarka enggau lengkas laban penanggul tu suah dikenataika rayat ngelama tu,” ku iya.
Iya madah munyi nya sepengudah ngulu Program Ziarah Unit Komunikasyen Perintah Sarawak (UKAS) ba Kampung Melayu Roban ditu, kemari.
Berebak enggau nya, ADUN Krian madah bisi sekeda menara telekomunikasyen ke udah tembu didiri tang apin beoperasyen.
“Ambika banding ba Krian bisi sekeda menara udah tembu digaga tang enda mayuh iya ke ulih diguna tauka beroperasyen.
“Nya alai kitai ngarap ari aum nya ila penanggul menara ke apin ‘diconnection’ ulih teputar pia mega ngarap ke mensia mayuh ulih besabar,” ku tandu iya.
Sebedau tu Menteri KKD Fahmi Fadzil sebedau tu madahka opis menteri sida deka bebendar mutarka penanggul arus internet di Sarawak sebedau apus bulan September 2023.
Sama bisi datai Kaban Kunsil Nengeri (ADUN) Kalaka Mohd Duri, Sekretari Politik ba Opis Premier Sarawak, Bell Bernard Aggan, Tuai Penulung Direktor Seksyen Pematau enggau Pemansang Komuniti UKAS Anwar Hanafi Ardimansyah, Pegawai Nguasa Pelilih Mit Roban Steve Miller Nuas enggau ke bukai.-TVS
