SARATOK, 17 Sept: Program WAIfm Datai Nemuai deka diatur ba Rumah Agnes Suyah Japang di Mendas Asal Saratok kena 20 ngagai 22 Oktober tu.
Menijar WAIfm Kuching, Monica Midi madah, tuju program nya diatur dikena ngedut agi kaul raban WAIfm enggau bala peninga stesyen radio nya di menua pesisir.
“Siti chara dikena kami bekaul bekempit enggau orang ba luar betemu enggau bala peninga begulai enggau ejensi perintah enggau pengari rayat ngatur program ba rumah panjai,” ku iya.
Iya mansutka penerang nya pengudah tembu aum keterubah komiti pengatur Program WAIfm Datai Nemuai ke Saratok ba Bilik Aum Opis Pelilih Saratok, ditu kena Hari Empat tu tadi.
Nangkan ke nya, ku Monica pengawa ngatur program ke dikumbai ‘Radio di Lokasi’ (RDL) tu mega senutuk enggau pemansang dalam dunya pemadah diatu ti majak mansang nitih ke segang arus pemansang dunya.
“Program WAIfm datai nemuai tu kebendar iya dikumbai kami RDL tauka Radio di Lokasi, laban kelia orang semina ninga radio aja jarang meda bala DJ tauka Pengeluar Program.
“Nya alai, laban nitih ke arus pemansang diatu kitai enda tau dalam radio aja didinga orang tang kitai mesti pansut keluar begulai enggau orang ngambi ke kitai nemu orang rindu tauka enda ninga radio ke diatu dibandingka enggau kelia,” ku iya.
Ungkup penemu, program ke sebaka bisi empat kali udah diatur ba Saratok kenyau ari taun 2011.-TVS
