KUCHING,17 Sept: Menteri Besai Datuk Seri Anwar Ibrahim madahka agih belanja tambah sepenyampau RM1 bilion dikemendar dikena ngemansangka adan menua Sabah enggau Ssarawak.
Ku iya Perintah Besai ngemendarka agih belanja nya beduduk ari pemutus Indonesia mindahka palan ngatur menua ke Nusantara.
“Jakarta udah ngaga pemutus ngemansangka mengeri besai Nusantara di Kalimantan lalu kitai enggai tinggal nguna manah perengka guna nya dikena ngemansangka agi adan menua Sabah enggau Sarawak.
“Beduduk ari nya, aku ngemendarka belanja tambah ungkup projek di Sabah enggau Sarawak tu sepenyampau RM1 bilion agi dikena ngemansangka adan menua,” ku iya.
Anwar mansutka jaku nya rambau Pengerami Ngintu Hari Malaysia 2023 Renggat Nasional ba Stadium Perpaduan, ditu malam tadi.
“Aku udah ngasuh Sapit Menteri Besai Datuk Seri Fadillah Yusof ngerumban enggau nadai kebuah tulir ngaga Jalai Besai Pan Borneo ngambika ditembu enggau jampat ari taga ke udah ditetapka sebedau tu,” ku iya.
Berebak enggau nya, Anwar mega nandu semaya iya ngagai sekeda projek ngemanah sekula repuk ba serata menua dibaruh tanggungpengawa Opis Menteri Pelajar patut tembu bulan Oktober taun tu.
Dulu agi ari nya, Sapit Menteri Besai Datuk Seri Fadillah Yusof nengah sebengkah intebiu khas madah, antara sukut pemansang adan menua ke diberi perati iya nya ngemanahka Kompleks Kastam, Imigresen Enggau Kuarantin (CIQ) di sepanjai adan pintu besai antara Sabah, Sarawak enggau Kalimantan, bekau ari pengawa ngemansangka Nusantara, nyadi mengeri besai baru Indonesia di Kalimantan Timur.-TVS
