SARATOK, 17 Sept: Program WAIfm Datai Nemuai ke Rumah Agnes Suyah Japang di Mendas Asal Saratok bulan baru siti pelasar ke chukup manah dikena ngerembaika penerang ke beguna ngagai perayat di rumah panjai.
Nya, Kaban Kunsil Nengeri (ADUN) Krian Friday Belik ngarapka program ke diatur dua hari berunggu nya ila nerima sukung ari mensia mayuh ke diau besemak.
“Arapka program tu ulih ngenatai ke mayuh penerang ari ejensi perintah awakka ulih nambahka penemu bala pengani ba rumah panjai.
“Nya alai, kitai di menua Saratok lebih agi ba Krian tauka rumah ke semak sampal datai nyukung program ke diatur sida WAIfm begulai enggau Opis Pelilih Saratok sereta Palan Servis (DUN Krian),” ku iya.
Friday madah munyi nya ngagai raban media pengudah tembu aum keterubah Komiti Pengatur Program Waifm Datai Nemuai ke Saratok ba Bilik Aum Opis Pelilih Saratok kena Hari Empat tu tadi.
Ku terang Friday, mayuh macham aktiviti udah diperambu nyengkaum program beperindang enggau raban penanyi tebilang Iban.
“Mayuh macham program udah diperambu dikena ngisi awak maya nya ila.
“Siti program ke ke manah ngagai rayat maya nya, kitai udah ngangau sekeda ejensi perintah baka ari Opis Betanam Betupi ari Kaunsil Pelilih ari PDRM ari Opis Pengintu Pengelantang Sarawak enggau ari Opis Pengerai.
“Nambah ke nya mega program tu mega bisi mai bala penanyi tebilang Iban dikena merindang mensia mayuh,” ku iya.
Ungkup penemu, entara agensi perintah ke bisi ngambi bagi ba program nya ila baka Opis Pengerai (KKM), Kaunsil Pelilih Saratok (MDS), Opis Betanam Betupi, Opis Pengintu Pengelantang Pendiau Raban Bansa (JKM) enggau ke bukai.
Sama bisi datai Menijar WAIfm Kuching, Monica Modi, Pegawai Admin Sarawak (SAO) Opis Pelilh Saratok Laga Kueh, DJ WAIfm Stonton James enggau Edwin Nanggah sereta ke bukai.-TVS
