KUCHING, 17 Sept: Menteri Besai Datuk Seri Anwar Ibrahim meri jamin deka mutarka isu peminta hak enggau pemanah Sempekat Malaysia 1963 (MA63) ngagai Sarawak enggau Sabah.
Ku terang iya, pengawa mulaika peminta hak MA63 baka ke udah dipekat maya 1963 suba ukai agi pekara ke diperunding tang pekara nya patut dipejalaika.
“Aku enggai agi bisi asai ba Sabah enggau Sarawak iya nya Semenanjung Malaysia baka ke ngelaung laban kami iya nya rebak baru deka bejalaika enggau ngamatka nama pekara ke disebut enggau pekara ke dipekat bala apai kitai maya nya suba,” ku iya.
Anwar mansutka jaku nya rambau Pengerami Ngintu Hari Malaysia 2023 Renggat Nasional ba Stadium Perpaduan, ditu malam tadi.
Nangkan ke nya, iya meri terima kasih ngagai Perintah Sarawak laban rambai jaku ‘Segulai Sejalai’ ti mandangka semangat Malaysia baru diatu disebut semua rayat Malaysia.
Pengawa meretika rambai jaku Segulai Sejalai dipandangkan nengah penatai lebih 5,000 iku orang ngemenuhka Stadium Perpaduan, Kuching, Sarawak beserimbai enggau Pengerami Ngintu Hari Malaysia 2023 nya.
Jaku Segulai Sejalai diatu nyau nyadi lambang seati, serakup sereta semangat kerejasama ke teguh dalam ati rayat Malaysia.-TVS
