KUCHING, 17 Sept: Perintah besai diansak ngemeratka pemansang Sabah enggau Sarawak ngambika ulih besemekih enggau menua serantau lebih agi Indonesia ke benung nyingkang ngemansangka mengeri besai Nusantara ba Kalimantan.
Premier Sarawak, Datuk Patinggi Tan Sri Abang Johari Tun Openg madah, pengawa ngemeratka pekara nya chukup beguna laban nya ngaul atur negapka pengelikun adan menua Sabah enggau Sarawak.
“Enda tinggal mega pengawa ngemeratka pengelikun ba adan menua patut ditegap agi kelimpah inisiatif ngemanahka perengkaguna ba adan menua, lebih agi Kompleks Kastam, Imigresen enggau Kuarantin (CIQ),” ku iya.
Abang Johari mansutka jaku nya rambau Pengerami Ngintu Hari Malaysia 2023 Renggat Nasional ba Stadium Perpaduan, ditu malam tadi.
Ku terang Premier Sarawak…genap pekara ke diguna ba selampur menua semina ulih diberi enti politik tegap sereta kering.
Nya alai, Abang Johari ke mega Chairman Gabungan Parti Sarawak (GPS) meri jamin deka terus meri sukung ngagai Perintah Penyerakup dikena nyamin penegap ke udah bisi.
“Perintah GPS deka terus meri sukung ngagai Perintah Penyerakup ngambika penegap nya ulih dikena Perintah Besai nyaran ngagai Malaysia ke meruan, mansang enggau Madani.
“Tajapan, Sarawak enggau Sabah nagih sekeda pekara lebih agi bekaul MA63, nya ukai reti Sarawak, Sabah enggau Semenanjung enda ulih bekerejasama enggau negapka penyerakup ungkup Malaysia ke disayau,” ku iya.-TVS
