SARATOK, 16 Sept: Perambu deka bejalaika baru atur Chukai Barang enggau Servis (GST) sereta Chukai Untung Puku (CGT) mesti diserenih dulu, ku Friday Belik.
Kaban Kunsil Nengeri (ADUN) Krian nya madah, ukai pulai ke penyalah nyema Perintah Besai deka bejalaika baru GST laban atur nguna chukai nya udah kala dikena sebedau tu.
“Kitai bedau nemu pemutus pekara tu (atur bejalaika GST) nyadi manah agi kitai nganti dulu.
“Enti ngelansa pasal pemanah iya, GST tu kala dipejalaika ba menua Malaysia lalu nadai salah sistem tu dikena baru,” ku iya.
Iya madah munyi lebuh dipinta meri timbal bekaul enggau penemu dipansutka Menteri Ekonomi, Rafizi Ramli bekaul enggau perambu perintah besai deka bejalaika baru GST maya begulai enggau raban penerit adat meresa rega barang ba sebuah palan bebeli barang ditu, empai lama.
Ku terang Friday, pekara nya mesti diserenih ngambika enda kelalu meri empas ngagai ekonomi menua enggau ngenusah pengidup rayat lebih agi di menua pesisir.
“Taja pia kitai deka berunding ke empas iya ngagai rayat kitai laban utai tu (GST enggau CGT) kala dipejalaika.
“Tentu bisi kebuah mega iya dikinsil suba. Nya alai diatu utai nya deka dipejalaika baru, nyadi manah pansik silik nama empas iya ngagai ekonomi menua enggau rayat kitai (menua pesisir),” ku saut Friday.
Ungkup penemu, atur bejalaika GST penyampau enam peratus diketu perintah kena 1 June 2018 sepengudah perintah Pakatan Harapan (PH) bekuasa lepas Pengawa Bepilih Besai (PRU) dulu agi ari tu.-TVS
