KABONG, 15 Sept: Rayat di menua tu lebih agi ba sitak kunsil nengeri kalaka diperansang terus beserakup enggau pangan diri.
Kaban Kunsil Nengeri (ADUN) Kalaka Mohd Duri madah, ari pengawa beserakup ngelama tu ngujung ke perintah nyamai ngatur pemansang di menua tu.
“Ari penyerakup ti manah di Sarawak ngujung ke perintah nyamai ngatur mayuh agi pemansang lebih ari ke udah laban enti nadai penyerakup kitai (ketuai) tentu tusah deka ngatur pengawa,” ku iya.
Iya bejaku munyi nya rambau nutup Program Graduet Literasi Fungsian diatur Opis Pengintu Pengelantang Komuniti (KEMAS) Pelilih Saratok ba Rumah Galing Ason di Lubok Nibong ditu, kena Hari Tiga tu tadi.
Ku tandu Mohd Duri, ari penyerakup sereta gaya politik ti tegap mega ulih matak penatai pemeranak puku ke Sarawak.
“Empas ari penyerakup ti tegap sereta kering ditambah enggau politik ti manah dia ekonomi menua kitai deka terus ngerembai.
“Bekau ari nya mega deka ngujungka raban pemeranak puku tentu berebut deka meranakka puku ba bemacham sektor ekonomi di Sarawak,” ku iya.
Ngelansa senentang program diatur sehari nya bisi 30 iku orang lunggar umur nerima setipikit tamat belajar macha, nulis enggau ngira diatur opis KEMAS pelilih Saratok.
Semua sida tu datai ari Rumah Raweng, Kampung Perpat enggau Rumah Galing di Kabong.
Sama bisi datai, Pegawai Opis Kemas Pelilih Saratok Latif Amat, Penulung Pegawai Tadbir Opis Pelilih Kabong Awang Shafie Awang Sabli enggau ke bukai.-TVS
