KABONG, 15 Sept: Opis Pekara Dagang Dalam Nengeri enggau Ungkus Pengidup (KPDN) diansak patut suah agi ngatur Program Bejual Rahmah ba Sitak Kunsil Nengeri (DUN) Kalaka.
Kaban Kunsil Nengeri (ADUN) Kalaka Mohd Duri madahka, program nya chukup manah dikena mantu rayat kurang penatai pemisi berindik ari rega barang guna ninting hari ke majak niki.
“Baka Program Bejual Rahmah kitai endang chukup setuju lalu minta raban opis ke bekaul enti ulih atur mih program nya enggau suah ke agi (ditu) ngambi ulih mantu.
“Diatu kitai sama nemu rega barang semua niki magang,” ku terang Mohd Duri.
Iya madah munyi nya ngagai raban media sepengudah tembu nyuaka setipikit ngagai penyereta Program Graduet Literasi Fungsian (PLF) ari tiga buah rumah panjai diatur ba Rumah Galing Ason, Lubok Nibong ditu, kena Hari Tiga.
Ku tandu Mohd Duri, enti Program Bejual Rahmah nya suah diatur dia iya ulih mantu ngelempung ke tating belanja perayat ba sitak nya.
“Enti dikira ari taun nyin kemari enggau nyengkaum taun tu bisi tiga kali program baka tu udah diatur ditu.
“Nya alai, kitai minta patut suah agi (program tu) diatur (ditu) dikena mantu komuniti,” ku iya.-TVS
