KUDAT, 14 Sept: Pengawa ngemujurka program ‘Ini Warisan Kita’ misyen volunteer siswa ke Sabah mandangka pengawa Opis Menteri Penyerakup Menua (KPN) dalam negapka ketuai biak mantu bejalaika servis nulung komuniti.
Tuai Sekretari KPN, Datuk Noridah Abdul Rahim madah, program ke dipejalaika dibaruh Yayasan Volunteer Siswa nya udah meri empas positif nengah pengawa ngajar betemu terus antara mahasiswa enggau komuniti ke diau ba Sitak Genturung Pendiau (KRT) bekaul.
“Berengkah 9 Sept ke udah, 90 mahasiswa ari mayuh bengkah Palan Pelajar Tinggi (IPT) di Semenanjung Malaysia udah dibai kitai ke Sabah nyereta misyen serak tu ke ngaul tiga buah pelilih iya nya Kudat, Kota Marudu enggau Papar.
“Nengah program tu, kitai ngajar mahasiswa ngerandau enggau meda kediri pendiau komuniti enggau minta sida ke nembiak tu meri servis mantu pekara ke patut ungkup komuniti.
Tu chukup beguna kebendar iya laban kitai deka matih enggau nempa rebak baru ke ngembuan semangat volunteer,” ku iya.
Iya madah munyi nya maya dirandau ba Program Nyuaka Pemeri RTCARES ba Sekula Primari (SK) Limbuak, Pulau Banggi.
Tandu iya, program tu mega nyadi pelasar dikena raban nembiak ba Semenanjung Malaysia lebih ngelala sereta bekunsi bemacham budaya enggau adat lama ke udah bisi ba Sabah.
Kelimpah negapka komuniti, Noridah madah, pelajar mega diberi perati nengah program nya beratika pengurang ke ulih dikemanah dibaruh bidang kuasa opis menteri sida.
“Opis Menteri nengah YSS mega dka terus meda enggau matau baru progres genap projek ke udah dipejalaika enggau tu begunaka kerejasama rat enggau sitak genturung pendiau.
“Kitai mega deka meda nama agi ke ulih dibantu dibaruh bidang kuasa opis menteri enggau nyangka deka bekerejasama enggau opis menteri bukai ke ulih mantu kitai,’ku tandu iya.
Bisi 60 peranak KRT Kampung Limbuak nerima pemeri RTCARES iya nya bakul pemakai nyerumba program nya.-TVS
