SARATOK, 14 Sept: Bemacham program pemansang udah enggau benung dipejalaika perintah asil ari penegap politik sereta pemanah sukung ari rayat nengeri tu.
Nya alai, beserimbai enggau Hari Malaysia, pengari TVS bisi ngerandau peranak di sitak Saratok bekaul enggau pengasai ati sida bekaul enggau pemansang menua sekumbang Sarawak udah begulai dalam serakup Malaysia.
Ku penemu siku peranak Saratok, Tuai Rumah Jemat Garak, Sarawak diatu chukup jampat berubah asil ari bemacham inisiatif tauka program pemansang dipejalaika perintah.
“Sekumbang menua udah Merdeka, Sarawak diperati jauh endar udah maju, udah mansang.
“Ambika banding jalai dipeda udah menyana. Nya alai, arapka perintah dudi tauka sapa-sapa ke megai perintah udah tu ila mesti nerus ke pemansang ke udah dijapai menua kitai Malaysia sereta mega Sarawak,” ku iya.
Nangkan ke nya, ba penemu Sulong Pawi iya berasai temegah meda pemansang ke dijapai Sarawak laban sebedau tu Sarawak dikumbai menua ke jauh tinggal dibanding enggau nengeri bukai.
“Suba kitai (Sarawak) dikumbai nengeri ke tinggal ari sukut pemansang tang diatu kitai meda program pemansang digaga perintah kitai lebih jauh ke mua enggau nyadi chunto ngagai nengeri bukai.
“Nyadi sehari tu, kitai berasai betuah enggau meri terima kasih lebih agi ngagai niang Tok Nan enggau Datuk Seri Najib ke udah bebendar ngemujurka projek Pan Borneo ungkup nengeri tu,” ku iya.
Ungkup penemu, pengerami ngintu Hari Malaysia renggat nasional taun tu berambaika jaku Segulai Sejalai deka diintu ba Stadium Perpaduan di Kuching.-TVS
