SEBUYAU, 11 Sept: Bisi 13,699 ruang bilik udah bulih bekal karan nengah Projek Belanja Peminta Tambah Tauka Laun (ALAF) naka suku kedua taun tu.
Menteri Utiliti Enggau Telekomunikasyen Sarawak, Datuk Julaihi Narawi madah, dalam timpuh ke sama, 5,902 ruang bilik benung dikemujur nengah projek ditanggung penuh Perintah Sarawak dibaruh opis menteri iya sereta dipejalaika Sarawak Energy Berhad.
Ku terang iya, 532 ruang bilik udah nerima pemendar pelin enggau benung nganti penyikap pengari kunteriktor, ditangkan 615 ruang bilik ba renggat udah diterima pelin enggau 7,579 peminta benung ba tikas survei sereta laluh iya 6,000 ruang bilik benung ba renggat ditisih.
“ALAF iya nya program sepanjai maya ke dipejalai chara berenggat ungkup nyendiaka bekal karan 24 jam ngagai sitak menua pesisir,” ku iya maya pengawa bejadika Projek ALAF Kampung Seruyuk, ditu, ensana.
Julaihi ke mega Kaban Kunsil Nengeri (ADUN) Sebuyau madah kenyau dipejalaika ari taun 2018, RM230 juta belanja udah diagih dikena nentuka peranak sarawak ulih ngasaika bekal karan 24 jam.
“Laban endang udah nyadi pengawa perintah dikena ngelempungka tating belanja rayat menua pesisir, peminta dibaruh sambung skim karan menua pesisir mega ulih minta skim bantu nyambung tali karan dalam rumah.
“Peminta ulih mayar ungkus nyambung tali karan chara pupuk pengelama 36 bulan nengah bil karan Sarawak Energy Berhad,” ku iya.
Lebuh nerang silik, Julaihi madah dikena nyendiaka bekal karan ngagai peranak ke diau ba menua pesisir, dia Perintah Sarawak udah ngelangkar siti pelin dikumbai Pelin Besai Karan Menua Pesisir 2015.
Pelin nya, ku iya dibantai betuju dikena ngerumban pengawa nyambung bekal karan ngagai sitak menua pesisir nengah sekeda program ke dipelanja Perintah Sarawak.
Nengah pelin nya mega, Perintah Sarawak udah ngungkupka RM2.37 bilion dikena ngemujurka 188 projek bekal karan menua pesisir ba Sarawak.
Ngelansa pasal ALAF di Kampung Seruyuk ditu, iya madah bisi 43 peminta ba Kampung Seruyuk ngasaika bekal karan nengah belanja manggai RM143,626 dipejalai berengkah bulan September 2022 sereta tembu penuh bulan June 2023.-TVS
