SPAOH, 10 Sept: Raban bujara tauka bujang dara di Bukit Saban terus diperansang ngerejista diri nyadi kaban Serakup Besai Nembiak Sarawak (Saberkas) ngambika penau sida nyadi ketuai ulih diansah.
Kaban Parlimen Betong Dr Richard Rapu madah, nengah Saberkas chukup mayuh program diatur perintah sekalika nya ba renggat pelilih tauka ikas lebih tinggi.
“Nuju bala nembiak tauka bujang dara ke beumur 40 taun ke baruh ambi mih Saberkas nyadi ke siti palan endur kita chakah agi ngereja pengawa bekaul enggau aktiviti gerempung ukai perintah (NGO).
“Saberkas iya nya siti ari serakup nembiak ke pemadu besai sereta regas di Sarawak,” ku iya seraya meransang bala nembiak anang enggau ngerejister diri nyadi kaban Saberkas.
Dr Richard madah munyi nya, lebuh ngarika Sapit Premier Sarawak Datuk Amar Douglas Uggah Embas nangguhka Program Pejalai enggau Ngabas Nembiak Mansang N. 37 Bukit Saban Renggat Ke -3 ba Diwan Mensia Mayuh Spaoh, kemari.
Ku tandu Dr Richard, Saberkas endang pelasar ke chukup manah ngagai raban bujara ti deka ngerembaika penau diri nyadi ketuai.
“Chukup mayuh aktiviti enggau program bisi diatur.
“Nya alai Saberkas tu nyadi siti pelasar ke chukup manah endur raban bujang dara kitai ngiga tauka ngansah penau nyadi tuai sekalika diatur ba renggat pelilih tauka ba bukai.
SOT 2 OUT :
Berebak nya, urung 300 iku raban bujang dara di Bukit Saban udah ngerejista diri nyadi kaban baru Saberkas.-TVS
