MIRI, 10 Sept: Rayat di Kampung Pangkalan Lutong ditu diperati chukup gaga ulih betemu enggau Yang Di-Pertuan Agong Al-Sultan Abdullah Ri’Ayatuddin Al-Mustafa Billah Shah sereta Raja Permaisuri Agong Tunku Azizah Aminah Maimunah Iskandariah nyerumba penatai raban Diraja ke Miri.
Siku peranak genturung pendiau nya, Sarima Nyoeto, iya ngarapka program Bejalai Ngelala Borneo ulih diatur baru dudi hari.
”…kelalu gaga, enda kala tu sejarah betemu enggau Agong ba Miri.
“Tu keterubah mih Agong kitai kitu. Kami ngarapka Agong bukai udah tu nunda tu.
“Tu mega peluang manah kitai betemu lalu betabi jari. Enda kala betabi enggau Agong. Tu kami datai kitu ketegal deka betemu enggau Agong,” ku iya.
Berebak enggau nya, ba penemu Mohd Shawal Narawi, iya madah diri berasai gaga sereta sinu meda penatai Raja ke Kampung Pangkalan Lutong lalu ngarapka pengawa iya dikemujur sekumbang program Bejalai Ngelala Borneo.
“Aku berasai gaga sereta sinu laban nyangka tu seumur idup aku, aku ngasai keterubah iya betemu enggau Agong datai ke Miri lalu iya limpang ke menua kami.
“Nyadi ngarap Agong udah tu ulih ngereja pengawa ke baka tu laban jarang ulih meda Agong baka tu sebedau tu,” ku iya.
Udah nya, Penghulu Sitak Lutong, Nasir Abdul Rahim madah, program Bejalai Ngelala Borneo kelai penyiru Raja ngagai rayat lalu semangat nya endang meri pengaga ngagai mensia mayuh lebih agi komuniti di menua pesisir.
“Tu keterubah iya rayat ditu berasai gagit laban tu keterubah iya amat.
“Penatai Raja endang siti kelai iya siruka rayat iya nya sanggup datai jauh ketegal deka meda rayat ditu.
“Ngarapka dudi hari ila, Agong ke nangkan tu ila datai mih kitu baru ngelawa menua kami ngambika ulih nyadi pengingat ngagai rayat ditu,” ku iya.-TVS
