SPAOH, 10 Sept: Program ‘Jelajah Dan Outreach Belia’ Mansang N. 37 Bukit Saban ulih nyadi siti pelasar dikena mensia mayuh ditu nambahka penemu dalam bemacham bidang.
Sapit Menteri ba Opis Premier Sarawak, Datuk Sharifah Hasidah Sayeed Aman Ghazali madah, nengah program luar opis baka nya mega ulih dikena Serakup Besai Nembiak Sarawak (Saberkas) ngerapat ke kaul seraya ngenatai ke bantu ngagai mensia mayuh.
“Tu nyadi siti pelasar dikena kitai begulai ngerapat kaul enggau mensia mayuh sereta enggau agensi perintah.
“Pia mega nengah NGO ke bisi dikena kitai mantu komuniti ngambika kitai ulih ngiri penemu ngagai komuniti kitai,” ku iya.
Hasidah ke mega Chairperson Komiti Biro Pekara Orang Indu Saberkas Nengeri Sarawak madah munyi nya lebuh bejaku Program ‘Jelajah Dan Outreach Belia’ Mansang N.37 Bukit Saban ditu, kemari.
Nangkan ke nya, ku Hasidah pekara tu beguna dikena nentu ke juluk enggau perambu perintah Sarawak ti deka nyadi nengeri maju enggau ngembuan ekonomi ke tegap.
“Kitai deka semua rayat ngembuan penatai pemisi sereta ngembuan ekonomi ke tegut.
“Nya alai kitai nguna pelasar tu narak mensia mayuh awak ke ulih nyukung pengawa perintah ngatur mayuh agi pemujur ungkup rebak dudi,” ku iya.
Sama bisi datai Kaban Parlimen Menua, Senator Susan Chemerai Anding, Sapit Residen Betong, Mahra Salleh, Sekretari Politik ba Opis Premier, Roselind Mapong Sabai enggau ke bukai.-TVS
