KUCHING, 8 Sept: Taja Komiti Komunikasyen enggau Multimedia Malaysia (SKMM) udah nyekat sekeda laman web enggau konten media, pengemeran media enda ibuh irau bekaul enggau lebas bejaku.
Taja pia, berita ke dibantai patut belebas, iya nya enda ngelanggar atur enggau undang-undang ke udah bisi, ku Menteri Komunikasyen enggau Digital, Fahmi Fadzil.
“Sekumbang aku udah gawa nyadi Menteri Komunikasyen enggau Digital, dibaruh Perintah Penyerakup tu, empai kala siku pan pemberita ke ditangkap. Nadai, sebedau tu bisi.
“Aku agi ingat maya pandemik, pan bisi. Aku ukai deka ngangkai, semina deka bekunsika konteks.
“Lebuh aku udah bejalaika pengawa tu empai bisi siti pan surat kabar ke ditutup sereta lisin dibatak baru,” ku iya nengah progam Dialog TVS : Pendigitalan Komunikasi, Kesediaan Negara ke dibantai, malam tadi.
Berebak enggau nya, iya mega ngelansa pasal Akta Majlis Media Malaysia diatu benung digaga.
“Akta ke dikemendarka kitai, Akta Media Malaysia, chara pemadu manah nyema kitai meda ba mayuh menua bukai nyengkaum ba United Kingdom ambika banding, bisi siti ejensi ke nyaga ngemata raban pengemeran media.
“Pengemeran media tu empu mih ti deka berandauka isu atur, isu pemberita, isu pengelantang pendiau enggau ngatur kediri, tang ba raban perintah nadai champur jari kitai agi nyaga isu-isu pengelikun,” ku terang iya.
Udah nya, Fahmi madah ISU atur mantaika berita tu ukai semina penanggul ditapi raban pengemeran media tang nyadi isu ke suah nyadi ba mensia mayuh ke gagit deka nyadi pemberita enda diaku dalam mantaika berita pemadu baru.
“Aku pemadu irau lebuh meda sekeda video dikunsi enggau nadai ati sinu sereta beradat,” ku iya.
Fahmi madah diri irau meda ulah sekeda orang ti ngerembaika gambar enggau video, nyadi ulah ngemalu enggau ngelanggar hak peribit ruang bilik tudah ke dituntung penusah insiden elmina empai lama ke udah.
Berebak enggau nya, iya minta raban ke bekaul patut nyereta kus dibaruhOpis Pemadah nyema deka chakah dalam bidang pemberita ngambika sida bisi penemu bekaul enggau chara mantaika berita.
Bekau ari nya, Fahmi mega ngarapka semua pengemeran media patut mekuhka prinsip “First and Right” dalam mantaika berita ngambika nadai agi nyadi isu berita bula dikerembai.-TVS
