SARATOK, 8 Sept: Empat buah menua ba sitak Kunsil Nengeri (DUN) Krian mungkur Brayang, Mudong, Ulu Sebetan enggau Ulu Grenjang enda lama agi deka disikap enggau bekal ai beresi.
Kaban Kunsil Nengeri (ADUN) Krian Friday Belik madah, peminta nyambung bekal ai beresi ngagai empat sitak menua nya udah dikemendarka perintah dibaruh Langgur Pemansang Malaysia Lumpar Ke-12 (RMK12).
“Aku baru udah dipadahka Opis Bekal Ai Menua Pesisir Sarawak (JBALB) senentang projek nya deka dipejalaika ba menua Brayang enggau Mudong nengah RMK12.
“Udah nya, ba Ulu Sebetan pan udah dikemendar nengah pansik tengan penggal RMK12.
“Nya alai, enti empat buah menua tu udah datai ai beresi reti nya selampur sitak Krian tau dikumbai kitai 100 peratus datai bekal ai beresi ari JBALB,” ku iya.
Iya madah munyi ngagai TVS pengudah ngulu Pengawa Makai Selamat Ke Pemujur Bala Atlit enggau Jurulatih Kaunsil Lumba Sekula (MSS) Zon Roban ba Pekit Kaunsil Lumba Sekula Betong 2023 ba Diwan Makai Sekula Primari (SK) Mudong, kemari.
Udah nya, Friday madah, ungkup menua Ulu Grenjang peminta nyambung paip bekal ai beresi mega udah dikemendarka Perintah Besai nengah Opis Pemansang Genturung Pendiau enggau Wilayah (KKDW).
“Ungkup menua Ulu Grenjang ke alai bisi dua buah rumah panjai bedau datai ai, udah tu sama udah dikemendarka tang nya ari Opis Menteri Pemansang Genturung Pendiau enggau Wilayah (KKDW) ari Perintah Besai dibaruh tusun renggat ketiga,” ku iya.
Taja pia ku Friday, iya apin ulih nyemetak madah kemaya projek nyambung paip nuju empat bengkah menua nya berengkah laban genap iti projek ari perintah endang bisi atur ditetapka.
“Nya alai kira ke berita manah lalu aku bedau nemu pelin ari JBALB empu baka ni pengelengkas utai tu ulih belabuh.
“Apin ulih bedanji apin ulih nyemetak madah ni maya utai tu ulih belabuh laban iya beguna ke pengawa baka ngaga survei, arus ke ditengah, ni pemanjai utai nya sereta spekspikasi ke silik.
“Nya alai, semina diatu aku ulih bekunsi ke utai tu udah dikemendar Perintah Penyerakup,” ku iya.
Ungkup penerang, pemujur projek nya ila dijangka ulih mutar ke penanggul suntuk ai beresi ngagai 21 buah rumah panjai enggau tiga buah sekula primari ba empat bengkah menua nya.
Berebak enggau nya, Friday bisi ngungkupka belanja dibaruh Projek Tranformasyen Menua Pesisir (RTP) sepenyampau RM200,000 ngagai Sekula Primari (SK) Mudong enggau RM5,000 ungkup Gerempung Apai Indai enggau Pengajar (PIBG) sekula nya.-TVS
