SARATOK, 7 Sept: Polis Diraja Malaysia (PDRM) Pelilih Saratok benung nyidi siku orang enggau sebuah entukar ke bisi kaul engau penusah aksiden ti ngujungka bebadi nyawa ba jalai raya KM 94, Jalai Sarikei/Betong, Roban.
Tuai Opis Polis Pelilih Saratok, Mordani Tanin madah penusah aksiden nya nyadi kena urung 10.40 pagi tadi ngaul siku deriba motosikal ti ngujungka tudah terus midang ba palan penusah nyadi.
“Beduduk ari nya, raban polis minta saup barang sapa ti bisi penerang bekaul enggau penusah aksiden tu madah terus ngagai pegawai pemansik kes, Inspektor Royston bin Ubak nengah lumur 016-3130153 tauka datai terus ngagai balai polis ke besemak,” ku iya nengah sebengkah penerang sehari tu tadi.
Sebedau penusah nyadi, tudah ke bebadi iya nya Mesa anak Ajon, 84 asal ari Rumah Jembu, Rantau Sukat, Roban dalam rantau jalai ari Sarikei nuju ke Saratok.
Nitihka pansik tumu, maya datai ba palan penusah nyadi ba endur ke tiku sereta nanjak bukit tudah enda memukai kena rimbas sebuah entukar ke enda dikelala bela datai ari Sarikei nuju ke Saratok.
“Bekau ari nya, tudah tepawah ngagai parit sepiak kiba jalai raya sereta dikenuku madamka seput ba palan penusah nyadi,” ku iya.
Kes dipansik nitihka Seksyen 41 (1) Akta Pengangkutan Jalan 1987.-TVS
