DEBAK, 7 Sept: Pengawa nembiak Sekula Sekondari (SMK) Saribas ti diasuh ngumpul pupu ungkup Program Zumbathon ba sekula nya nerima bemacham timbal ari sekeda bala apai indai nembiak ba sekula nya.
Beduduk ari nya, Sapit Menteri Pemansang Indu, Nembiak Mit enggau Pengelantang Komuniti (KPWKK) Sarawak, Mohd Razi Sitam madahka pekara nya enda patut dipetalatka laban pengawa ngumpul pupu ngaul raban nembiak sekula ukai pekara baru tang udah suah dipejalaika ba sekula bukai di menua tu.
“Kebendar program baka nya endang program ke suah dipejalaika ba dini-dini sekula ba menua tu.
“Taja pia, pekara nya empai kala nyadi isu bekaul enggau penyampau duit ke mesti dipupu.
“Nya alai, aku melabaka pekara ke dikemegau ba media rama semina saru penemu aja,” ku iya seraya madah pengawa nya suah dikerea sekula lebih agi di Kuching enggau ke bukai.
Razi ke mega Kaban Kunsil Nengeri (ADUN) Saribas madah munyi lebuh dipinta meri penemu bekaul enggau isu nembiak SMK Saribas ti bisi bejalai ke pengawa ngumpul pupu duit ari mensia mayuh ti ngerekai ba Facebook sebedau tu sepengudah tembu program di Debak kemari.
Berebak enggau nya, Razi ngelalau bala kaban komiti Gerempung Apai Indai Nembiak enggau Pengajar (PIBG) SMK Saribas patut meri penerang silik sereta nyentuk agi ngagai bala apai indai nembiak di Debak ngambi ke sida badu agi betalat ke pekara nya.
“Aku minta bala apai indai nembiak enggau kaban komiti PIBG meri penerang ti silik sereta nyentuk ngagai bala apai indai nembiak ti nadai nyadi kaban PIBG.
“Tu ngambika mereti pasal penyampau ke udah ditetapka ba kad pupu nya.
“Kebendar nya semina saran aja endang baka selama nyema siku-siku nembiak nya teulihka duit pupu pemadu mayuh dia sida deka bulih perais,” ku iya.
Sebedau tu, isu nembiak SMK Saribas ngumpul pupu tu dipeda mayuh dikerembai ba sekeda laman media rama.-TVS
