SARATOK, 4 Sept: Kaban Kunsil Nengeri (ADUN) Kalaka, Mohd Duri nyemetak madahka, semina orang Sarawak empu nemu kati gaya pendiau enggau nyaga menua tu enggau manah.
Ku iya, penemu Premier Sarawak, Datuk Patinggi Tan Sri Abang Johari Tun Openg deka chalun Gabungan Parti Sarawak (GPS) bediri ba semua 82 kerusi maya Pengawa Bepilih Nengeri (PRN) endang patut sereta engkeman.
Tambah mega, Perintah GPS diatu benung neruska pengawa tuai ke dulu, niang Adenan Satem ti keran meda Sarawak diintu manah sereta meri perati ngagai pemansang menua pesisir.
“Siti penemu ari Yang Amat Berhormat Premier ti mai reti, iya deka ke menua Sarawak diintu orang Sarawak empu munyi ke dipadah niang Tok Nan suba Intu Sarawak Jaga Sarawak laban mina orang Sarawak aja nemu baka ni nyaga Sarawak,” ku iya.
Mohd Duri madah munyi nya lebuh dirandau TVS sepengudah tembu bejadika Pekit Pemanah Bunyi enggau Gaya Burung Tebuka Saratok diatur Gerempung Pekicau Saratok (KPBS) ba Arena Petanque Saratok, kemari.
Ku tandu iya, mayuh pemansang nyata udah dipeda asil ari penegap politik enggau polisi dipejalaika perintah Sarawak ungkup pemaik rayat di nengeri tu.
“Nya kelai YAB Premier meretika juluk manah rayat Sarawak lalu kitai nyerah ngagai YAB Premier.
“Kebendar kitai temegah enggau pemujur pengawa ti udah diayanka YAB Premier lebih agi ngaul sektor ekonomi dikena nyamin pengelantang, pengelikun menua kitai,” ku iya.-TVS
