SPAOH, 3 Sept: Diatu penyeranta ukai nyadika dalih nampung pelajar ngagai tikas ke tinggi laban perintah udah bisi Yayasan Sarawak enggau mayuh macham turu dikena mantu barang sapa ke bisi penanggul deka nampung pelajar.
Sapit Premier Sarawak Datuk Amar Douglas Uggah Embas madah beduduk ari nya bala apai indai anang enda bebendar ngansak anak diri belajar lalu anang masau jam lalu patut sama enggau orang ngerebut peluang.
“Kitai endang deka ke semua anak kitai pandai… betul?
“Bulih pengawa lalu bulih pengidup ti menyana tu mih utai dikearapka kitai.
“Nya alai, penyeranta ukai ke dalih enda ulih nyambung sekula belajar ngagai ikas tinggi kitai bisi Yayasan Sarawak enggau turu ke bukai dikena mantu,” ku iya.
Uggah ke mega Kaban Kunsil Nengeri (ADUN) Bukit Saban mansutka penemu nya maya bejadika Program Bukit Saban Education Fair 2030 ba Diwan Mensia Mayuh, Spaoh kemari.
Ngelansa bekaul enggau program ke diatur sehari nya, Uggah madah diri gaga meda pemanah sukung ari mensia mayuh lalu iya ngarapka program nya ulih diatur ba endur ke lebih lantang agi dudi hari.
“Tabi puji ngagai komiti pengatur tu terubah kitai ngatur ‘Education Fair’ ba Spaoh tang dipeda nerima sambut ti manah.
“Semina peda aku, alai chukup sempit. Nyadi taun dudi kitai ngatur manah agi ngena kimbis sereta ba alai ti besai agi, awakka nyamai endur mandangka penerang ke patut dipadah ngagai rayat,” ku iya.
Berebak enggau nya, Uggah ngelalau bala apai indai enggau nembiak di Spaoh patut nguna peluang enggau penerang ti bisi dibantaika ba Program Education Fair nya ngambika ulih meri pemaik ngagai sida.
Ungkup penemu, program nya keterubah diatur di Spaoh lalu mujur nerima penatai urung 1120 iku mensia sereta dipasuk 22 bengkah agensi baka Universiti Malaysia Sarawak (Unimas), Petroleum Sarawak Berhad (PETROS), Yahos School Of Skill (Yahos), Universiti Teknologi Sarawak (UTS), ICATS enggau ke bukai.-TVS
