SPAOH, 3 Sept: Urung 1.5 juta pengawa puang berengkah dibuka Perintah Sarawak nengah mayuh macham program dibaruh Strategi Pemansang Pasca Covid – 19 (PCDS) 2030.
Sapit Premier Sarawak, Datuk Amar Douglas Uggah Embas madah, beduduk ari nya raban nembiak lebih agi di Betong tauka Spaoh enda tau enda nyikap diri berengkah ari diatu.
“Diatu Perintah Sarawak udah bejalaika Program PCDS 2030 nengah bemacham program deka dikemujur dikena nentu ke juluk kitai deka muka urung 1.5 juta pengawa puang manggai 2030,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya lebuh bejadika Program Bukit Saban Education Fair 2030 ba Diwan Mensia Mayuh, Spaoh kemari.
Berebak enggau nya, Uggah madah ari penyampau nya urung 200, 000 pengawa puang dipelaba deka diungkupka ngagai bidang pengelandik.
“Urung 200, 000 dipelaba deka diungkupka ngagai bidang pegelandik.
“Nitih penerang ari PETROS sida deka beguna ke urung 200 ribu pengereja pengawa ke bisi pengelandik ba taun 2030.
“Pia mega ba ekonomi baru bemacham bidang ekonomi deka enggau udah dipejalaika.
“Nyadi ungkup kuasa beresi iya nya ekonomi sekular dikena nentuke utai tanam utai kitai enda dibuai ngapa kitai bisi dagang karbon, minyak enggau gas,” ku iya.
Udah nya, Uggah madah perintah GPS sigi nguji enggau naka ulih nentu ke semua peluang enggau muka awak ngagai rayat belajarka bidang pengelandik laban dalam PCDS 2030 perintah deka meda rayat nengeri tu ngembuan penatai pemisi ke tinggi.-TVS
