BETONG, 2 Sept: Genap program tauka aktiviti ti diatur Serakup Besai Nembiak Sarawak (SABERKAS) mesti dikemaru senutuk enggau peminta rebak baru diatu ngambika terus relevan.
Sekretari Eksekutif SABERKAS Sarawak, Iszuan Haroni mansutka penemu nya rambau program nanguh Karnival Saberkas Lima Puluh Taun ba Diwan Mensia Mayuh di Spaoh, ensana.
“SABERKAS udah manggai umur 50 taun ke alai mayuh orang udah ngasaika pemanah ba baruh serakup tu.
“Nya alai, kitai sigi seruran bebendar gawa sereta nentuka gerempung tu mengkang relevan.
“Kitai mega naka ulih ngemaruka program lebih agi ngaul raban nembiak sereta komuniti diatu,”ku iya.
Nangkan ke nya Iszuan madah, SABERKAS udah netapka tiga kluster ti deka dikenatika nyerangkung pekara ekonomi, rama, rekreasyen, pengelantang pendiau, pelajar sereta pengawa nyadi tuai.
“Enti bejaku pasal program 50 taun SABERKAS kitai bisi tiga bengkah kluster ti diberi perati baka program bekaul enggau ekonomi enggau dagang.
“Kedua kluster ke diberi kitai perati iya nya bidang rama, rekreasyen enggau pengelantang pendiau sereta ketiga bekaul enggau pekara pelajar, latih sereta pengawa nyadi tuai,” ku iya.
Sebedau nya, Pengerami Nangguhka Karnival SABERKAS Pampang Bukit Saban 2023 nyerumba dipenyadika Kaban Parlimen Betong, Dr Richard Rapu ngarika Sapit Premier Sarawak, Datuk Amar Douglas Uggah Embas.
Sama bisi datai ngulu program tu Pegawai Pelilih Betong, Alfred Geling Ason, Pegawai Nguasa (SAO) Pelilih Mit Spaoh, Lister Clement Guwie, Pegawai Ukas Bagi Betong, Tony Malang Chabu enggau ke bukai.-TVS
