BETONG, 2 Sept: Palan sejarah di Bukit Sadok ke kala nyadika kuta Bujang Berani Iban benama Rentap tauka nama amat iya Libau anak Ningkan (ada 1800 – midang 1863) maya betempuh enggau Rajah James Brooke taun 1863 deka dikemanahka ngambi ulih nyadi siti agi produk dagang temuai di Betong.
Kaban Parlimen Betong, Dr Richard Rapu madah, Projek Bukit Sadok datai ari buah penemu Sapit Premier Sarawak, Datuk Amar Douglas Uggah Embas sereta nerima sukung penuh ari Premier Sarawak, Datuk Patinggi Tan Sri Abang Johari Tun Openg ti udah ngemendarka agih belanja dikena ngemanahka palan nya.
“Siti langgur ke udah disetujuka Premier Sarawak lalu dikemujurka Datuk Amar Douglas Uggah empu iya nya deka ngangkat manah ngemansangka Bukit Sadok.
“Kitai nemu ba sitak Betong, sejarah tauka cherita pasal Bukit Sadok endang bisi kuta endur Rentap menya ngenan ke menua.
“Projek nya udah dikemendar ungkup ngatur jalai lalu nyendiaka perengkaguna infrastruktur awak ke lantang endur temuai datai ngagai Bukit Sadok ila,” ku iya maya dirandau TVS ba Palan Servis Parlimen Betong, apin lama ke udah.
Ku tandu Dr Richard iya andal bendar ke pemujur projek nya ila ulih matak penatai temuai ke Betong.
“Nya alai enti jalai udah manah datai ba atas din, semua perengkaguna udah disikap menyana tentu bisi program deka diatur din ila.
“Nyadi nya pelaba aku ulih matak temuai enda putus datai ke Betong, ukai bemusin,”ku iya.
Nitihka penerang, peninggi Bukit Sadok urung 20,910 meter tauka 6,863 kaki tu kala nyadi kuta Rentap tauka digelar ‘Rentap Tanah, Runtuh Menua’ lebuh ngetan diri ari diserang soldadu Charles Brooke kelia.
Genteran jaku ke suah dipanjungka Rentap maya nyatup munsuh ke meruan idup nyentuk ke sehari tu iya nya ‘Agi Idup Agi Ngelaban.’-TVS
