BETONG, 2 Sept: Karnival 50 Taun Serakup Besai Nembiak Sarawak (SABERKAS) Pampang Bukit Saban ti keterubah diatur chukup mantupka ati.
Sekretari Saberkas Pampang Bukit Saban, Chambai Mancha madahka, taja baru iya diatur tang karnival nya mujur nerima sambut ke chukup manah ari perayat ke mendam ba pelilih nya.
“Aku berasai gaga ati sereta temegah laban tu keterubah iya kitai ngatur karnival ti besai baka tu ba Bukit Saban lebih agi ba Spaoh ditu.
“Nya alai, pemayuh kitai ke udah datai ditu begempuru urung 500 iku ngujungka pengerami tu bejalai enggau lanchar sereta richah,” ku iya.
Chambai mansutka jaku nya maya program nanguh Karnival Saberkas 50 Taun ba Diwan Mensia Mayuh di Spaoh, ensana.
Berebak enggau nya, iya madah, tusun program ba karnival udah tu ila patut dikemanahka agi ngambi ulih matak mayuh agi penatai raban nembiak ngambi bagi ba program ke diatur SABERKAS Bukit Saban.
“Kami komiti pengatur kebendar deka meda mayuh agi orang datai.
“Nya alai, udah tu ila kitai deka ngatur mayuh agi program baka program lumba seraya dikena ngiga bakat nembiak kitai Iban ke datai ari rumah panjai,” ku iya.
Ungkup penemu, bisi lapan bengkah aktiviti bisi diatur sepanjai hari nyerumba program karnival nya baka senamrobik (zumba), bebasikal rindu ati nyerumba merdeka, latih nimbakka laja, pengawa meri darah, car boot sale, pekit betanda, pekit karaoke SABERKAS Idol enggau Pekit SABERKAS Queen.-TVS
