SPAOH, 1 Sept: Raban bujang dara tauka bujara di Spaoh enggau Bukit Saban bela diperansang masuk nyadi kaban Serakup Besai Nembiak Sarawak (SABERKAS) Pampang Bukit Saban.
Kaban Parlimen Betong, Dr Richard Rapu madah, tu beguna bendar dikena nentuka genap iti perambu SABERKAS Pampang Bukit Saban udah tu ila ulih meri pemaik ngagai sida.
“Program Saberkas bisi tiga kluster iya nya rama, pengelikun pendiau, pekara pelajar, ekonomi enggau ke bukai.
“Nya alai aku minta semua lebih agi nembiak bela masuk SABERKAS ngambika ulih besaup ngemujurka semua aktiviti ke udah diperambu perintah,” ku iya.
Dr Richard ke mega Chairman Komiti Pengatur Karnival SABERKAS nyerumba Pengerami Jubli Emas 50 Taun Saberkas Sarawak madah munyi nya maya ngarika Sapit Premier Sarawak Datuk Amar Douglas Uggah Embas nanguhka Karnival SABERKAS Pampang Bukit Saban 2023 ba Diwan Mensia Mayuh ditu, kemari.
Udah nya, iya meransang kaban komiti besai SABERKAS Bukit Saban patut chakah agi berundingka program ke ulih meri pemaik ngagai komuniti di Spaoh enggau Bukit Saban.
“Aku minta semua tuai-tuai enggau kaban komiti besai SABERKAS Bukit Saban bela berundingka aktiviti sekalika nya ngaul pekara pelajar, ekonomi, nembiak, budaya enggau ke bukai ke ulih meri penguntung nembiak di Spaoh enggau Bukit Saban,” ku iya.
Ba pengerami nya, Dr richard madahka pemeri agih belanja ari ADUN Bukit Saban Datuk Amar Douglas Uggah Embas sepenyampau RM30,000 dikena SABERKAS Bukit Saban ngatur aktiviti bekaul.
Udah nya, Dr Richard empu meri bantu sepenyampau RM20,000 ngagai SABERKAS Bukit Saban.
Sama bisi datai Sekretari Eksekutif Saberkas Sarawak, Iszuan Haroni, Pegawai Pelilih Betong, Alfred Geling Ason, Pegawai Nguasa (SAO) Pelilih Mit Spaoh, Lister Clement Guwie, Pegawai Ukas Bagi Betong, Tony Malang Chabu enggau ke bukai.-TVS
