BETONG, 1 Sept: Kaban Parlimen Betong Dr Richard Rapu besemaya deka terus chakah mai pemansang ngagai sitak nya ungkup pengelantang rayat mayuh.
Maya randau Eksklusif enggau TVS ba Opis Servis Parlimen Betong empai lama iya bisi ngelansa pemansang menua Betong kenyau menua udah merdeka.
Ku Dr Richard, enti diperati ari sukut infrastruktur pemun baka jalai alun ba parlimen betong diatu tau dikumbai udah bisi magang nuju semua genturung pendiau enggau rumah panjai.
“Parlimen Betong bisi tiga sitak Kunsil Nengeri (DUN) iya nya N.35 Saribas, N. 36 Layar enggau N. 37 Bukit Saban.
“Nyadi ketetiga Dun nya tadi ari segi infrastruktur asas baka jalai raya tau disebut deka 100 peratus udah bisi akses ngagai semua genturung pendiau rumah panjai tauka genturung pendiau, ku iya.
Kelimpah ari jalai raya, bekal ai beresi enggau bekal karan 24 jam mega udah bisi magang semina ba siti dua endur deka dikemanahka agi.
“Bekal karan 24 jam kira 100 peratus semina rumah-rumah ti baru didiri aja apin bisi sambung karan.
“Taja pia, peminta sida nya dikumbai kitai ‘peminta laun’ laban bekal karan endang udah datai.
“Udah nya, bekal ai beresi enti ba sitak Saribas 100 peratus (bisi), Layar enggau Saban (mega bisi) nyengkaum bekal ai alternatif (ai bukit graviti) di menua ulu,” ku iya.
Lebuh ngelansa ba senentang servis telekomunikasyen Dr Richard madah, nitihka ripot ari Komiti Komunikasyen enggau Multimedia Malaysia (SKMM) naka ke ujung taun 2020 bungkur arus telekomunikasyen ba Parlimen Betong iya nya manggai 79 tauka 89 peratus.
Ku Dr Richard, semua penyadi pemansang ke bisi diasaika rayat di Parlimen Betong diatu endang asil ari pemujur tauka penegap politik ke dikembuan kenyau ari taun 70-an suba.
“Semua utai tu nyadi ketegal penegap politik ba menua kitai dalam Parlimen Betong kenyau ari taun 70-an menya.
“Kitai endang dipegai segulai sejalai enggau perintah endang nadai limpang nya alai chukup nyamai alai tuai-tuai kitai ngatur program-program pemansang.
“Kenyau ari taun 70-an sampai sehari tu jeman pegai Barisan Nasional (BN) nyentuk ngagai jeman pegai Gabungan Parti Sarawak (GPS) ke diatu,” ku iya.
Nambah nya ku Dr Richard, mayuh pelin pemansang bukai deka dipejalaika perintah GPS di Betong udah tu lebih agi nengah penumbuh Agensi Pemansang Bagi Betong (BDDA).
“Program-program pemansang ke bukai baka projek pemansang infrastruktur ke bukai ti besai sigi mayuh udah dilangur baka ngemanah ke agi jalai alun, akses tauka iya ke baru ke ditemu kitai iya nya STOLPort tauka iya nya Padang Bilun Mit di Bebuling Spaoh.
“Pia mega kitai bisi projek Jalai Second Trunk Road ari Penom pan deka berengkah digaga diatu nyambung ari Pasar Betong lalu meraka Batang Layar ba semak Jematan Bebanggai ke diatu.
“Tu ila deka diganti enggau jematan baru lalu terus ngagai Spaoh ngagai padang bilun lalu pansut ba Paku Central.
“Siti agi iya nya jalai ke ari Second Trunk Road mega ke ari Sri Aman meraka Batang Lupar pansut di menua Lidong dia, nyadi enti utai nya udah nyadi ila kitai ari Betong ke Simanggang semak bendar,” ku terang iya.
Nangkan ke nya, Dr Richard madah siti agi projek jalai kedua ke udah dikemendar lalu deka berengkah iya nya ngemanah jalai alun berengkah ari simpang paku nuju ke menua Ulu Krian lalu rembus ba pakan.
Ku iya, enti jalai nya udah tembu dia rayat mayuh deka meda menua Betong deka lebih tebuka .
Projek jalai tu ditampung enggau pengawa ngemanah agi jalai ari simpang Spaoh nuju ke pasar Spaoh sereta bisi sekeda agi jalai ba menua ulu mega deka dikemanah ungkup pengelantang rayat di Betong.
Berebak enggau nya, Dr Richard meri terima kasih ngagai tuai tauka pengari rayat ba sebedau tu laban udah bebendar gawa ngemansangka menua Betong baka ex-Sapit Kepala Menteri, Datuk Patinggi Tan Sri Alfred Jabu Numpang, ex-Kaban Parlimen Betong, Datuk Robert Lawson Chuat enggau ex-Kaban Kunsil Nengeri (ADUN) Saribas Datuk Wahbi Abang Junaidi.
Udah nya, Dr Richard besemaya deka terus bekerejasama enggau tiga iku ADUN ba baruh parlimen Betong diatu ngambika semua langur tauka pelin pemansang ke udah diperambu ulih bejalai enggau mujur.-TVS
