KUCHING, 1 Sept: Ex-Sapit Datuk Bandar Kaunsil Mengeri Kuching Selatan (MBKS), Hilmy Othman sehari tu tadi udah mujur angkat sumpah nyadi Datuk Bandar Dewan Bandaraya Kuching Utara (DBKU) ke baru.
Iya dichiri mangku pengawa nyadi Datuk Bandar DBKU Ke-8 nganti Datu Junaidi Reduan ti udah abis timpuh megai pangku pengawa nya kena 31 Ogos 2023.
Pengawa angkat sumpah nya diatur ba mua Premier Sarawak Datuk Patinggi Tan Sri Abang Johari Tun Openg ke mega digulu Sekretari Perintah Nengeri Sarawak, Datuk Amar Mohamad Abu Bakar Marzuki ba Bilik Aum Ringkat 2, Wisma Bapa Malaysia.
Berebak enggau nya, Abang Johari nyadi saksi pengawa nyerahka pangku pengawa ari Datuk Bandar DBKU sebedau tu Datu Junaidi Reduan ngagai Hilmy Othman.
Nitihka rikod, Hilmy Othman kala nyadi Kaunselor Kaunsil Mengeri Kuching Selatan (MBKS) pengelama 11 taun.
Ba taun 2016 iya dichiri nyadi Sapit Datuk Bandar MBKS nyentuk 31 Ogos 2023.
Kelimpah ari nya, Hilmy Othman mega nyadi Datuk Bandar Keterubah bisi peneleba gawa nyadi kaunselor lalu iya nyadi Datuk Bandar DBKU pengelama dua taun nyentuk 31 Ogos 2025.
Sama bisi datai ngemataka pengawa nya, Sapit Premier Sarawak Dato Sri Dr. Sim Kui Hian ke mega Menteri Pengerai Mensia Mayuh, Pengawa Berumah Sereta Perintah Lokal, Sapit Menteri Utiliti enggau Telekomunikesyen Datuk Dr Abdul Rahman Junaidi.-TVS
