KABONG, 31 Ogos: Bisi 143 iku peranak ditu udah nerima surat pemendar berumah ba Skim Nangkir Genturung Pendiau (SPK) Hulu Kabong Fasa Satu.
Berindik ari nya, Kaban Kunsil Nengeri (ADUN) Kabong Mohd Chee Kadir ngelalau sida ke udah nerima surat nya anang sesekali nyual lot tanah tauka rumah sida ngagai orang bukai.
Kebuah pia, ku iya laban sebedau tu bisi kes nyual lot ditemu nyadi ba Skim Nangkir Genturung Pendiau Kampung Muroh.
“Chunto ba Skim Muroh udah kelalu mayuh betukar lot. Nya kebuah kitai enggai pekara baka tu nyadi baru.
“Sida ulih nyual lalu duit tama tanchut tang pemeli enda ulih mindah nama pengempu rumah tauka lot tanah nya ngagai nama diri empu laban penetap endang enda tau dijual.
“Aku arap utai tu enda nyadi agi di Kabong ditu,” ku iya maya bejaku ba pengawa nyuaka surat pemendar berumah ba Skim Nangkir Genturung Pendiau (SPK) Hulu Kabong Renggat Keterubah ba Dewan Mayuh Guna Balai Polis Pelilih Kabong, kemari.
Nangkan ke nya, ku Chee Kadir pengawa nyendiaka skim SPK iya nya dikena meri peluang ngagai peranak ngulihka lot rumah ti sebagi ari insiatif beguna perintah nyendiaka genturung pendiau ti lebih manah sereta meruan.
“Perintah endang deka meda kita ngembuan genturung pendiau ke meruan, manah sereta ngembuan kereban tauka perengka guna ti chukup.
“Arapka udah tu kita ulih ngaga rumah diri empu nitihka pemisi diri,” ku tandu iya.
Sama bisi datai, Penguasa Tanah Enggau Survei Bagi Menua Betong, Morris Nayup, tuai-tuai opis perintah, tuai-tuai raban bansa enggau ke bukai.-TVS
