MUKAH, 31 Ogos: Datuk Patinggi Tan Sri Abang Johari Tun Openg mantaika pengasa ati iya berindik ari laya ke majak nyadi antara bala ketuai ba menua tu tegal ngulihka sukung politik.
Kenu ku Premier Sarawak, laya nya semina deka ngujungka Malaysia lemi.
Nya alai, Abang Johari ke mega Chairman Gabungan Parti Sarawak (GPS) ngelalau semua raban badu belaya enggau pangan diri laban nya deka ngujungka pambar ba pengarap, bansa, enggau menua.
“Enti kitai majak nuduh pangan diri sereta majak ‘bebintis’ munyiku niang Tok Nan (Pehin Sri Tan Sri Adenan Satem) nyadi tulang enggau pikir kitai semina berundingka chara dikena ngalahka munsuh.
“Aku berasai sinu laban diatu menua enda tentu ulih numpu penuh ngagai pengawa pemansang,” ku iya.
Iya madah munyi nya maya Pengerami Ngintu Hari Kebangsaan 2023 di Politeknik Mukah, sehari tu tadi.
Pengerami nya bela digulu Pemangku Tuai Pemegai Menua (TYT) Sarawak, Tan Sri Datuk Amar Mohamad Asfia Awang Nasar, Sapit Premier Sarawak, Datuk Amar Douglas Uggah Embas, Menteri Pemansang Indu, Anak Mit enggau Pengelantang Komuniti Sarawak, Dato Sri Fatimah Abdullah sereta Sapit Menteri Ekonomi, Datuk Hanifah Hajar Taib.
Nerang silik, Abang Johari madah bisi mega ketuai diperati nyau beambi ulih ngena isu bansa enggau pengarap ke ulih mechahka komuniti pupu bansa ketegal deka ngulihka sukung politik.
“Udah tentu nya enda manah ungkup menua lebuh dunya benung napi mayuh penanggul lebih agi pandemik COVID-19, perang sereta ubah klimate dunya.
“Selampur menua enti nitih patut begempung napi penanggul tu,” ku iya.
Berebak enggau nya, lebuh ngelansa pasal Pengerami Hari Kebangsaan taun tu, Abang Johari madah mayuh pemansang ke udah dijapai menua nyengkaum Sarawak.
“Dalam kandang 66 taun, taja agi mayuh ruang ke patut diisi enggau reti pengelepas enggau merdeka kita, enda ulih ditingkah mayuh pemansang udah dijapai menua enggau Sarawak ke nyadi sebagi ari Malaysia nyema dibanding enggau menua bukai ba rantau tu,” ku iya.
Ba jaku iya, Abang Johari mega madahka haribulan Tanah Melayu merdeka kena 31 Ogos 1957 kebendar sama besai reti baka Sarawak merdeka kena 22 Julai 1963 asil ari buah penemu ngempung Tanah Melayu, Sarawak enggau Sabah, nyengkaum Singapore dikearap ulih numbuhka sebuah menua baru ke diberi nama Malaysia kena 16 September 1963. -TVS
