BETONG, 30 Ogos: Raban nembiak diperansang patut pintar nguna peluang sereta besemekih dalam mayuh macham bidang pengawa dagang nyema deka nyadi siku pedagang ti mujur dudi hari.
Sapit Menteri Nembiak, Lumba enggau Main sereta Pedagang Sarawak, Dato Gerald Rentap Jabu meransang raban pedagang nguna pengelebih pemayuh tubuh rayat ari lapan sitak Kunsil Nengeri (DUN) di Betong ti udah manggai 150,000 iku ngulihka peneleba seraya nyerungkai potensi sebarang aktiviti dagang ti tau ngenataika asil pemisi tambah ngagai sida.
“Nya alai, anang takut nguji. Pekara lumur satu patut ditemu kitai di Betong ditu nyengkaum ari Betong, Bukit Saban, Saribas, Krian, Kalaka, Kabong, Beting Maro enggau Lingga lapan iti sitak kita ada lebih ari 150, 000 mensia ke ulih penguna dalam ngerembaika makit dagang kita,” ku iya.
Rentap ke mega ADUN Layar madah munyi nya lebuh ngarika Menteri Nembiak, Lumba Enggau Main Sereta Pedagang Sarawak, Dato Abdul Karim Rahman Hamzah bejadika Program Youth Entrepreneur Set Up (YES) ba Dewan Tan Sri Alfred Jabu ditu, Hari Enam ke udah.
Nambah nya ku Rentap, pemisi infrastruktur pemun baka Jalai Besai Pan Borneo di Sarawak ulih nyadi pelantar nyungkak ekonomi peranak lebih agi di menua pesisir enggau ngangkatka tikas pengidup sida.
“Diatu pemisi jalai raya kitai udah tembu menyana. Pejalai ari Betong ngagai Sri Aman enda datai sejam.
“Nya alai, empas ari pemisi jalai ke menyana orang datai mega tentu deka mayuh. Nyadi kita mega patut bisi utai dijual, setuju enda? ku tanya iya.
Nangkan ke nya, Rentap meransang genap rumah panjai patut bisi nyendiaka servis ke diguna ba rumah panjai ambika chunto baka servis nguntin buk, servis ngantaka orang (makeup artis) enggau ke bukai.
Ungkup penemu, Program YES di Betong kira ke-11 kali udah diatur Opis Menteri Nembiak, Lumba Enggau Main Sereta Pemansang Pedagang Sarawak di menua tu.
Sama bisi datai iya nya Sapit Menteri Nembiak, Lumba enggau Main sereta Pedagang Sarawak, Dr Ripin Lamat, Sekretari Mendam Opis Menteri Nembiak, Lumba enggau Main Sereta Pedagang Sarawak, Morshidi Fredrick, Residen Betong, Richard Michael Abu Nawas enggau ke bukai.-TVS
