SRI AMAN, 27 Ogos: Opis Menteri Nembiak, Lumba enggau Main Sarawak deka bekerejasama enggau Sarawak Sport Corporation (SSC) sereta Gerempung Boxing Nengeri Sarawak (SABA) ngemanahka sekeda infrastruktur ba Stadium Betutup Simanggang.
Sapit Menteri Nembiak Lumba enggau Main Sarawak, Dato Gerald Rentap Jabu madah, sida deka lebih numpu ngagai sukut pengelikun mensia mayuh ti deka ngemataka pekit boxing ungkup SUKMA 2024.
“Ari sukut penyikap, sepi aku kitai udah sedia diatu kitai begulai enggau opis menteri enggau aku empu sereta SSC deka ngemanahka agi Stadium kitai (Betutup Simanggang) tu ungkup SUKMA taun baru,” ku iya.
Rentap ke mega Kaban Kunsil Nengeri (ADUN) Layar madah munyi nya ngagai raban pemberita pengudah tembu ngemataka Pekit Boxing Tebuka Sarawak ba Stadium Betutup Simanggang, malam kemari.
Lebuh nerang silik, Rentap madah entara pekara ke deka diberi perati udah tu iya nya ruang pemerati endur duduk ba stadium nya kelimpah sukut pengelikun.
“Kitai meda tadi alai duduk enda tentu muat alai mensia mayuh ke bisi datai kitu.
“Nya alai dikena meransang semangat lebih agi ngagai tim Sarawak ila, dia SSC deka beratika baka ni chara nyangka ulih nambahka penuduk ke mayuh agi.
“Pia mega iya ke pemadu beguna kitai mega deka bekerejasama enggau sida PDRM enggau Bomba (nyaga pengelikun) nangika bisi pekara enda disadang (kes emejensi enggau ke bukai),” ku iya. -TVS
