KUCHING, 27 Ogos: Pekit Bintang Lagu Klasik Iban Ke-3 Renggat Semifinal deka diatur kena 2 September tu bepalan ba Langkau Arau Rumah Asap Dayak Stutong.
Chairman Gerempung Anak Seni Iban (PASIMA) ke mega Tuai Pengatur Pekit, Isa Lee madah, bisi 20 iku pemekit deka besemekih ngerebut 10 penuduk ngagai renggat final ti deka diatur kena 28 Oktober bepalan ba Christian Ecumenical Worship Centre ditu.
“Pekit Bintang Lagu Klasik Iban diatu udah datai ba peringkat Semifinal lalu deka diatur kami kena 2 September ba Langkau Arau Smoke House di Kuching.
“Maya nya ila bisi 20 iku Semifinalis deka ngerebut penuduk 10 iku ungkup masuk renggat final,” ku iya.
Lebuh ngelansa senentang Pekit Final Bintang Klasik Lagu Iban tu dia Isa Lee madah sida bisi ngangauka penanyi veteran Iban, Datin Senorita Linang, Angela Martin, Champion Bintang Klasik Lagu Iban Renggat Keterubah Eisner Nala sereta mayuh agi artis ke bukai.
“Pia mega maya pekit final nya ila, kitai bisi diperindang raban penanyi baka ex-champion Pekit Bintang Lagu Klasik Iban Keterubah suba iya nya Eisner Nala.
“Kelimpah ari nya penanyi ke bukai bela dikangau kami iya nya siku penanyi veteran ke mengkang dikerinduka mensia mayuh iya nya Datin Senorita Linang, Angela Martin enggau ke bukai,” ku iya maya dirandau TVS ba Langkau Arau Rumah Asap Dayak Stutong ditu, empai lama.
Ungkup penemu, gelar champion pekit tu ila deka mai pulai perais mata duit RM2,500 disempulang enggau trofi, setipikit sereta hamper.
Udah nya, lumur dua enggau tiga nerima perais mata duit RM1,500 enggau RM700 bela disempulang trofi, setipikit enggau hamper.
Berebak enggau nya, Isa Lee meransang mensia mayuh ti deka ngemataka pekit final tu enggau lebih semak sida ulih meli tikit tumu ari iya empu sereta kaban komiti pekit berengkah ari diatu.
Temuai dipebasa disadang datai maya Pekit Final Bintang Klasik Lagu Iban Ke-3 tu ila iya nya Sapit Menteri Dagang Temuai, Industri Kreatif Enggau Seni Pemerindang Sarawak, Datuk Snowdan Lawan.-TVS
