SRI AMAN, 27 Ogos: Parti Sa’ Ati Rayat Sarawak (SUPP) Pampang Simanggang ngelempaika pemutus ngagai semua parti komponen Gabungan Parti Sarawak (GPS) iya nya PRS, PBB enggau SUPP bekaul enggau kerejasama antara Parti Progresif Demokratik (PDP) enggau Parti Sarawak Bersatu (PSB).
Tuai SUPP Pampang Simanggang, Datuk Francis Harden Hollis madah, enti PSB deka bekerejasama sida patut madamka parti nya awak ke semua kaban sida masuk PDP.
Ba senentang sida ti deka begulai patut iya tutup mih PSB ngambi semua kaban PSB masuk PDP tang semua tu bepanggai ngagai pemutus ari parti komponen GPS baka PRS, PBB, SUPP” ku iya meri timbal bekaul enggau Sempekat Pemereti Ati (MoU) kerejasama ke ditanggam antara PSB enggau PDP sebedau tu.
Iya ke mega Tuai Besai Pekara Wang SUPP madah munyi nya ngagai TVS ba Kompleks Lumba Sri Aman empai lama.
Nangkan ke nya, Harden ke mega Kaban Kunsil Nengeri (ADUN) Simanggang madah, nyema kerejasama entara PDP enggau PSB mujur, iya ngarapka penuduk asal ke diarika pengari rayat kededua parti nya enda diubah.
“Kitai mesti ingat penuduk enda tau dibai sida. (Chunto) penuduk ba (DUN) Bawang Assan enda patut Wong Soon Koh mai ngagai PDP sama mega enggau (DUN) Engkilili enda patut dibai ngagai PDP,” ku terang iya nyemetak.
Ungkup penemu, ba sebengkah Pengerami Makai Lemai Penyerakup PDP-PSB ke diatur di Sibu sebedau tu Presiden PDP, Dato Sri Tiong King Sing melabaka kerejasama antara kededua parti nya deka diputuska abis laun bulan Disember tu ila.
Naka tu, ku iya kededua parti nya benung mutarka sekeda pekara enggau isu ti bekaul enggau gempung parti sereta dikearapka ulih mantu meri servis ke lebih manah ngagai rayat Sarawak.-TVS
